內地家居行業近排接連傳出創辦人離世消息，短短三個幾月內，已經有四位知名企業創辦人以極端方式結束生命，其中三人仲係做家居或者建材生意。業界形容，呢啲悲劇反映咗房地產寒冬下，家居行業陷入前所未有嘅深層危機。

最新一單涉及「居然智家」董事長兼CEO汪林朋，公司喺上星期六（27號）發公告，證實汪林朋喺屋企不幸身故，終年五十幾歲。佢亦係11日內第二位離世嘅家居企業創辦人。

汪林朋旗下公司前身係「居然之家」，2019年借殼上市，當時市值高達人民幣630億元，佢個人持股近六成，身家一度達到368億元人民幣，被封為湖北首富。不過根據《胡潤排行榜》2025年最新資料，佢身家已經縮水到得返約125億元。

有消息話，汪林朋喺今年4月曾經被武漢江漢區監察機關留置，其持有股份即時被司法凍結，直到7月23日先解除留置、轉為責令候查。佢喺放出4日後離世，事件令外界議論紛紛，疑點重重。

實際上，由4月中開始，內地已經有幾位企業家以非正常方式離開。除咗汪林朋，仲有紹興金點子紡織創辦人畢光鈞、杭州西子電梯董事長劉文超、同埋廣州靚家居創辦人曾育周。財經作家吳曉波指出，呢幾位企業家年紀都喺五十歲左右，創業超過20年，曾經主導地區大型企業，有啲仲上過富豪榜，但最終都逃唔過行業寒冬嘅洗禮。

其中，廣州靚家居喺7月17日宣布創辦人曾育周墮樓離世，同日公司亦宣告破產清算。靚家居2001年成立，業務一度覆蓋華南多個大型商場，分店過百。但據流傳嘅「停業通知」，公司長期蝕錢、資不抵債，決定全面停業。有分析話，靚家居業務過度依賴地產業，一旦樓市凍過水，就即刻撐唔住。

除咗接二連三嘅離世事件，內地多間家居企業高層近排亦傳出被調查。自5月起，紅星美凱龍創辦人車建興同富森美董事長劉兵先後被紀檢機關帶走，三大賣場巨頭幾乎同時捲入風暴。

根據統計，2025年頭五個月，家具行業整體營收同比下跌3.9%，而利潤更暴跌27.9%，超過一半上市家居公司預料錄得虧損。有財經媒體形容，一連串悲劇係房地產風暴蔓延到下游產業嘅具體體現。有啲企業家疑因為資金鏈斷裂、憂鬱抑鬱，加上受調查壓力影響，最終選擇咗絕路。