英國手機失竊案頻密,到底啲失機最後去咗邊?英國傳媒近日踢爆,一條跨越歐亞、超過一萬公里嘅地下供應鏈正默默運作,而香港就成為咗其中一個關鍵轉運站,成千上萬部被偷嘅手機喺度被「洗白」,再流返入市面。
報道指出,單單倫敦去年就有超過八萬宗手機失竊案,而當中大約有七分之一懷疑最後流入香港,再經觀塘鴻圖道一帶嘅工廈轉售。記者直擊發現,鴻圖道1號嗰幢31層高嘅大廈係成條供應鏈嘅核心樞紐,大廈入面有大約130個單位,當中超過三分之一係做二手機買賣。唔少來自英美嘅網民都喺網上討論話,佢哋部失機個定位多次顯示喺呢度出現。
有記者以買家身份落場走訪,估計成棟大廈有超過一百萬部手機做存貨,款式型號新舊不一。有啲單位雖然得幾百呎,但入面堆滿紙箱,外面仲寫住「iCloud已鎖」、「已解鎖」、「有ID/無ID」等標籤,懷疑好多手機都曾經被鎖定,有可能係非法來源。
鴻圖道42號另一棟工廈亦被調查列為可疑地點。據悉,一位來自英國嘅地產代理詹姆斯早喺2022年喺倫敦市中心俾飛車黨搶咗佢部 iPhone 11 Pro,10日之後透過「尋找我的 iPhone」功能發現,部機定位竟然就係喺鴻圖道42號。
記者再以買家身份潛入42號,向一間叫「永易通國際貿易公司」嘅舖頭查詢可唔可以買到「平靚正、可以喺英國用」嘅手機,對方話「依家冇貨」,但可以安排運送返英國。大廈最少有六個單位都做手機買賣,雖然難以確認詹姆斯部手機係咪真係喺入面,但情況非常可疑。
據報,大量來自英國、歐洲等地嘅被盜手機會經香港,再轉送去深圳。無論手機係咪已經鎖死,入面嘅螢幕、電池、晶片、電路板、銅線等等零件都有價值,可以拆機翻新。如果成功破解咗鎖,更加可以當成完整手機再賣去其他國家,賺錢能力成倍計。有黑客甚至會用釣魚電郵或者恐嚇方式,試圖向原機主拎解鎖資料。
報道仲指出,好多買家來自印度、西非或者中國,每個星期專登飛嚟香港掃貨。有啲手機之後會再轉運去第三國,又或者經黑市改機之後重新上架。因為亞洲、中東同非洲好多地方唔受全球行動通訊系統協會(GSMA)監管,令到被列為失竊嘅手機喺當地照樣可以用,變相助長黑市流通。