中國北方近日遭遇嚴重暴雨侵襲，北京、河北、山西、天津等地陸續傳出災情，當中以河北省情況最嚴重。承德市灤平縣早前出現山坡地崩塌，造成4人死亡、8人失蹤。阜平縣亦因暴雨引致山體滑坡，釀成2死2失蹤。中央部門已經啟動應急救援機制，並撥款支援災後重建。

北京方面，多個遠郊地區，包括密雲、懷柔、平谷等地受災嚴重。河流水位暴漲，部分地方發生山洪爆發，大量泥沙湧入村落，交通中斷、電力同通訊一度癱瘓。密雲情況尤其危急，有村莊到凌晨都未能恢復對外聯絡。有安老院被洪水包圍，多架汽車俾水沖走，居民被逼緊急撤離。

中央氣象台喺昨日發出暴雨黃色預警，而北京嘅延慶、懷柔、密雲等地更升級為紅色暴雨預警。強降雨引發山泥傾瀉，超過3000人被迫疏散。密雲水庫入水量創建庫以來新高，當局已經對密雲同懷柔水庫實施洩洪，以紓緩水壓。

密雲居民潘女士憶述，凌晨兩點左右，佢同家人一共七人喺當地一間農家院留宿，突然間洪水湧入：「水浸到我哋胸口，我哋根本唔敢出門」，最後幾個人唯有跳窗走到鄰近高地民宿避難，最終由救援隊用剷車救出，所幸無人受傷。佢哋返到農家旅館後，發現成間屋已經被厚厚淤泥覆蓋，屋內全爛，目前全家人已經安全返家。

而喺河北灤平縣馬營子滿族鄉南台子西溝村，連日暴雨導致山體崩塌。官方公布，截至今日中午，當地災情已造成4人死亡，仲有8人下落不明。中國國家防災減災救災委員會已啟動針對河北嘅國家四級救災應急響應，並派出工作隊去現場協助搜救。

北京市政府就宣布，由今晚8點起啟動防汛一級應急響應，全市進入最高戒備狀態。當局呼籲市民非必要唔好出街，危險地區與主要搶險通道會實施臨時交通封閉措施。根據情況，部份地鐵線、巴士服務可能會暫停。

政府亦宣佈，全市學校暫停面授課堂與戶外活動，所有工地全面停工並疏散工人。旅遊景點、公園、林場會關閉，遊客會被勸離。山洪溝道會封閉，住喺山區低窪地段或危樓嘅居民，要聽從安排，盡快撤離。有關部門亦會安置受災居民。

同一時間，山西亦出現因暴雨引發嘅災情，大同市一架載有12人嘅中型巴士喺暴雨期間失聯，當地已展開搜救行動。河北阜平更錄得單日最高雨量，導致山體滑坡，釀成人命傷亡，災情仍然不斷擴大。