內地多個地方近日爆出自來水污染危機，事件由西安、杭州擴散到湖北、江西、廣西、安徽等地，唔少市民喺社交平台貼片發圖，爆料話自己屋企水龍頭流出啡黃色、有異味嘅水，形容似「泡屎水」，洗澡就好似「浸喺糞池」。大批網民要求當局徹查水源問題，追究失職官員責任。

西安臨潼區棣陽村居民最近發現，屋企自來水係深褐色，味道怪怪地，情況同杭州早前爆出嘅供水事故非常相似。有居民拍片見到水龍頭流出啡啡地、帶臭味嘅水，畫面驚人。浙江杭州餘杭區就更誇張，懷疑係供水系統同排污系統「接錯喉」，搞到全區大量住戶飲到臭水。

有報道話，餘杭一帶自來水一度變成「奶茶色」，連帶出現刺鼻異味，有啲家庭仲出現皮膚敏感等健康問題。事件爆出之後，市民好嬲，網上有人要求市長「直播飲杯水自證清白」。不過，央視同幾間官方媒體冇正面報道呢啲事故，反而扯開話題去報美國，話「美國一半自來水含毒」，畀人批評係轉移視線，唔面對自己問題。

杭州市紀委監委調查之後承認，出事單位早就知水有問題，但無即時啟動應急機制，信息公布又慢，導致公共安全受影響。事後，當局對餘杭區副區長、住建局局長、水務控股董事長等7個官員作出黨紀政務處分。

而甘肅天水市近期亦爆出幼童鉛中毒事件。有啲家長日前一齊去政府部門要求交代，期間竟然畀公安驅趕，仲傳出有肢體衝突，相關片段喺網上瘋傳後隨即畀全面刪除。中央政府事後突然出通告，禁止地方將「微量元素檢查」列入兒童體檢，被批係想壓制輿論、掩蓋真相。

針對近期各地水污染同健康事件，微博、小紅書等平台不斷有新爆料，有片見到唔少人屋企啲水呈黃色、黑色，甚至有雜質異物，有人話好似「奶茶」、仲有「臭魚味」。雖然地方政府聲稱調查緊同提供協助，但民間信任崩潰，要求全面公開透明，同時嚴懲失職官員。