內地太陽能產業近排再起風波，中央出手向企業施壓，要佢哋避免惡性競爭，推動所謂「反內捲」政策。喺呢個預期之下，矽料同矽片價格大幅反彈，部分期貨仲不斷破頂。不過，有經濟學者就話，行業結構性問題根本未解決，今次升價可能只係短暫現象。

中國有色金屬工業協會下屬嘅矽業分會早前發出通報，話最近矽片價格明顯反彈，主因係多晶矽價格急升，加上好多企業由7月開始縮減產能，導致供應減少，推高價格。協會提供嘅數據顯示，工業矽、多晶矽同矽片三大材料嘅開工率跌到歷史新低，分別得返41.9%、38.6%同44.3%。

市場情緒明顯受政策影響。由本月開始，中央強推「反內捲」措施，唔少投資者以為行業會收歛競爭，推動多晶矽期貨持續走強。內媒報道話，多晶矽主力期貨合約最近突破每噸人民幣五萬大關，單月升幅超過六成，已經連升五個星期。

矽片價格亦因上游成本升而水漲船高。有業內人士透露，大廠最新報價比月頭高出六成。根據再生能源顧問公司英富霖數據，截至本月23號，矽片價格亦升咗超過兩成。業界指出，下游電池生產商開始接受貴價訂單，採購需求上升，導致市場短期供需變得緊張。

不過，矽業分會都提醒，雖然而家價格上升，但整體情況其實無咩改善。協會強調，矽料價格仍處於「中小幅震盪上行」狀態，要真正轉強，可能要有部分矽片企業喺面對高成本同需求疲弱情況下，選擇停產或者減產。

中泰國際首席經濟學家李迅雷就話，社會對「反內捲」政策太過樂觀。佢指出，今次唔同十年前搞嘅供給側改革，係喺「建設全國統一大市場」框架之下進行，政策主打市場化同法治化手段，目標係淘汰落後產能，維護公平競爭。

李迅雷強調，太陽能行業而家最大問題係需求端疲弱，唔係靠減產或者唔打價格戰就搞得掂。佢認為，政策重點係避免地方政府亂投資、減少重複建設，但要真正令產業可持續發展，仲需要更深層次嘅改革。