本地網媒《Channel C》由去年開始多次傳出財政困難，今年仲牽涉到涉嫌呃政府「百分百擔保特惠貸款」嘅風波。公司董事畀警方拉咗，多位員工被拖糧，最後公司被接管，並宣佈全面停運，而佢哋社交媒體帳戶都變成資產之一。

去到昨日（7月22日），原本屬於《Channel C》嘅Instagram同YouTube帳戶突然改名做《Tagline HK》，設計風格亦改為粉藍主調，聲稱自己係「全新媒體平台」，仲強調同原本《Channel C》嘅編採團隊冇任何關係。呢個突如其來嘅轉變，引嚟大量網民質疑。有支持者留言話失望，叫大家退追蹤。截至今日早上，IG帳戶跌至大約36萬followers，而YouTube亦跌到約70萬，明顯少咗唔少。

《Tagline HK》喺Instagram限時動態回應，話「多謝大家留意到我哋」，又話明白大家有唔同憂慮，強調平台係由一班本地有熱誠嘅年輕人組成，會繼續努力爭取認同。

新平台亦開設咗Facebook專頁，但讚好同followers都未算多，顯示成立日期係7月21日。至於YouTube頻道，就出咗第一條片，內容係網民評選「五大地獄級公屋」，而IG上面已經有11則貼文，內容包括本地娛樂、社會新聞，例如「懲教署戒毒所上演逃獄」、「屯門娜娜回歸」同「郭富城御用排舞師被追債」等等。

同一時間，由原《Channel C》編採團隊成立嘅新平台《Channel WE》昨日亦正式對外公佈訂閱會員計劃，共有四個收費級別，由$68至$1,380不等。平台話，經過兩個幾月籌備，終於搵到新投資者撐場，不過資源有限，有啲員工要轉做兼職或半職，多人要減薪先維持日常營運。

《Channel WE》表示，平台將會喺本周六（7月27日）正式開台，剛好係原《Channel C》原定四周年開台日。佢哋承諾會繼續製作新聞影片、直播、即時報道同體育直播等內容，亦會加入新元素，以「同途．並肩」為宗旨，繼續關注香港。

被訪問時，《Channel WE》編採團隊透露，《Channel C》嘅社交媒體帳戶極有可能已經當咗公司資產出售處理，佢哋對帳戶改名一事完全唔知情。據了解，《Channel C》喺被接管後，接管人曾經表示搵唔到任何資金，最終決定終止所有營運，連銀行帳戶都凍結晒。帳戶如今突然重啟同改名，引起外界對資產處理安排同未來動向嘅關注。