前《蘋果日報》創辦人黎智英被還押至今已經超過1,650日，佢喺獄中嘅待遇同案件審訊安排再度成為國際關注焦點。壹傳媒前董事、亦係《黎智英傳》作者祁福德（William McGurn）早前喺美國報章撰文，話黎智英被單獨囚禁，大部分時間冇冷氣、冇自然光，形容呢啲安排唔單止唔人道，仲可能構成酷刑。港府即刻發稿反擊，批評有關報道抹黑特區政府同司法制度。

祁福德喺文章入面講到，黎智英而家被關喺一個冇冷氣、自然光照極少嘅囚室，喺炎熱潮濕嘅夏天情況特別差，對一位77歲嘅老人嚟講非常不利。佢話，黎呢種長期單獨囚禁嘅狀況，已經超過聯合國容許嘅標準時間，可以話係「持續性酷刑」。港府話係黎自己要求咁樣安排，但祁福德質疑所謂「本人意願」只係一封本地律師樓寫嘅信，「好似人質被迫講嘅說話咁」，仲問點解唔比獨立觀察員探監，睇下實情係點。

港府隨即發聲明，冇點名但強烈回應，話西方媒體同組織再次「罔顧事實」，蓄意詆毀港府依法處理案件，試圖干預司法程序。聲明又強調，黎智英係「根據本人意願」安排在囚，待遇亦都恰當，並有保障人身安全。

不過祁福德接受外媒訪問時反駁，話黎智英其實連揀自己律師都冇得揀，佢原本想搵英國御用大律師Tim Owen代表，但畀港府否決，最後只能搵間由港府承認嘅本地律師樓。佢話，如果黎真係自願接受單獨囚禁，點解唔比國際專家入監視察、公開資料，反而咩都封住唔比睇？

祁福德又話，黎每日只有大約50分鐘放風時間，港府唔單止唔比傳媒拍攝，仲用遮幕封窗擋住畫面，連英國政府想探望都唔俾，做法嚴重違反國際外交公約，損害中國同香港形象。佢提到，英國外相林德偉（David Lammy）最近都講明，如果黎智英喺獄中死咗，會係「嚴重錯誤」，對中國聲譽造成毀滅性打擊。

另外，祁福德喺《黎智英傳》入面都有提到黎喺囚期間內心嘅掙扎同信仰轉變，話佢愈來愈相信宗教，雖然身處惡劣環境，但仍然堅持信念、唔放棄思考。祁批評，整個案件係用荒謬指控審判一個老人家傳媒人，全程冇陪審團，法官又係《國安法》指定人士，問：「咁樣叫做司法獨立？」

港府早前亦就外界評論發聲明，狠批「外國政客、反華組織同媒體」發表唔實講法，意圖誤導國際視聽，破壞審訊公信力。不過祁福德就話，黎智英案所引起嘅國際關注，其實係反映大家對香港法治同中國制度信心不斷下滑。