澳洲總理阿爾巴尼斯近日訪問中國，不過隨行嘅多間澳洲主流傳媒喺北京採訪時，竟然遇到突發狀況。有記者指喺拍攝期間，突然被一班疑似當地安保人員包圍，仲被要求交出攝影器材同刪除所有拍攝內容，場面一度相當緊張。

事發喺本月15日中午，距離阿爾巴尼斯與中國領導人會面僅得數小時。當時包括SBS、澳洲廣播公司（ABC）、Sky News、7號台、9號台等傳媒記者，喺澳洲駐華使館人員陪同下，去北京鐘鼓樓準備拍攝旅遊點新聞片段。

SBS首席政治記者Anna Henderson表示，佢哋拍攝期間，突然有八名身份不明、身穿便服嘅人上前質疑佢哋，話未見到拍攝許可，並強硬要求即刻刪除片段。即使澳方外交人員即場解釋記者有足夠手續，對方仍然包圍記者團，話要報警，仲反拍記者，要求交出設備。

ABC外交記者Stephen Dziedzic事後表示，澳洲方面事前已經向中方部門交齊記者名單同拍攝安排，連簽證文件都一應俱全，質疑今次事件係因為當地執法人員「收唔足風」，造成誤會甚至強硬處理，令外媒喺中國拍攝面臨高風險。

經過一輪外交官調停後，記者團先得以離開現場，冇被扣留或進一步查問。不過事件引發外界關注，中國雖然批出許可，但現場執行權力未必同步，變數仍多。

阿爾巴尼斯其後被問到有關事件，佢表示尊重新聞自由，但補充「中國顯然有唔同嘅媒體制度」，冇正面評論事件對中澳關係有冇影響。事件再次突顯，即使外媒手續齊全，喺中國地面操作仍可能受阻。