本港一間壽司連鎖店最近被踢爆，疑似用隔夜壽司飯，仲將飯箱喺室外擺放超過16個鐘，引起市民對食品安全嘅關注。電視節目《一線搜查》早前報道，指該壽司品牌聲稱「即日生產、即日銷售」，但原來中央工場早就預製好啲飯，運送前擺咗一大輪，做法有違其對外承諾。

被點名嘅係爭鮮（香港）食品有限公司。公司出聲明否認食品唔安全，話即時加強咗同物流供應商嘅溝通，又話會優化飯箱擺放流程。爭鮮強調，佢哋用嘅壽司飯同普通米飯唔一樣，係中央工場統一製作，仲會加食用醋調節酸鹼度，確保 pH 值唔高過 4.6，用嚟抑制細菌增生，話工藝符合香港食物安全標準。

聲明又講，所有壽司飯都有用一次性防拆封條封好，運送途中冇被打開或污染，仲會定期交比第三方國際認證機構驗樣，證實產品 pH 值同微生物指標都合格。公司話，每星期都會抽檢 pH 值，確保安全範圍之內。

爭鮮發言人表示，明白市民對食品安全有期望，會繼續檢討內部操作流程，重申食品安全係公司首要原則，承諾繼續提供乾淨、安全又好味嘅壽司。

不過事件喺網上即刻炒熱咗，唔少網民對爭鮮嘅回應表示唔滿，話公司講極都冇正面回應「隔夜飯」同「放街16個鐘」嘅問題。有人留言話：「即日生產即日銷售？講嚟呃人啦！」，亦有人話自己食完爭鮮「屙到七彩」，質疑佢哋品質監控有冇做足。

仲有市民喺社交平台分享親身經歷，有網民話5月13號喺爭鮮元朗地鐵站分店買咗個「玉子燒脆卷」，打開手卷竟然見到表面布滿霉菌，直情話：「好彩望咗吓先擺入口」，仲影咗相證明。根據包裝，嗰件壽司當日就係到期日，事主質疑：「未過期都可以發霉生毛？」

事件引起社會廣泛關注，大家再一次對即食食品嘅處理流程同食安監管提出疑問。不少網民呼籲政府部門加強巡查，確保市民真係可以食得安心。