美國國會「中共問題特設委員會」最近去信國務卿魯比奧，促請華府對香港警務處處長周一鳴實施制裁。信件指出，周一鳴接任後延續前任蕭澤頤嘅強硬政策，係北京打壓民主、削弱香港自治嘅主要人物之一，尤其關注佢以《港區國安法》加控黃之鋒。

信中提到，美國喺今年3月底宣布制裁蕭澤頤後僅兩日，蕭即時退休，由周一鳴頂上。委員會批評，周一鳴喺北京操控下持續壓制港人自由，包括港府上月6日加控黃之鋒「串謀勾結外國勢力」，擔心港府意圖令黃之鋒「終身監禁」，唔只係坐五年咁簡單。

呢封聯署信由委員會主席梅拿納爾同民主黨議員克里希納穆提簽署，佢哋又狠批警方喺今年六四前後大規模部署，恫嚇悼念者同路人，有市民只係手持鮮花、開住電子蠟燭，甚至喺公園聚埋都被捕，反映本港人權空間越嚟越細。

香港自由委員會基金會（CFHK）表示歡迎呢封信，話周一鳴繼續推行蕭澤頤年代嘅高壓政策，包括針對六四悼念活動、追查海外民主人士家屬同加控黃之鋒。CFHK呼籲美國儘快制裁周一鳴，釋出一個明確訊號：「美國唔會對北京同香港當局踐踏自由視若無睹。」

翻查資料，周一鳴喺今年4月正式接任警務處處長。佢上任初期接受訪問時話，美方嘅所謂「制裁」根本係「野蠻行為」，目的係想恫嚇香港公務員，令佢哋唔敢咁積極維護國安。他仲話：「如果我哋做嘅嘢無效，邊有人要制裁我哋？」聲稱就算受制裁都對佢生活冇咩影響。

周一鳴強調，維護國家安全係佢最重要嘅工作之一，仲想加強市民嘅國安意識。被美國制裁嘅香港官員唔只蕭澤頤，仲有國安公署署長董經緯、國安會秘書長區志光、前警務處助理處長趙詠蘭同王忠巡等人。