中國國家統計局今日（15日）公布，第二季國內生產總值（GDP）按年增長5.2%，累計總值達到66萬億元人民幣。官方形容經濟運行整體平穩、持續向好，指生產需求、就業情況、居民收入等都算穩定，社會局勢亦冇大變化。

統計局話，雖然內外挑戰依然存在，但經濟保持韌性，新動能逐步增強，高質量發展亦有所進展。不過，國際機構睇法未必一致。野村證券早前出咗份報告，話中國經濟可能接近轉捩點，預計下半年增長會明顯放慢，GDP增速可能跌到4%。

報告指出，有唔少數據都顯示經濟需求面臨「斷崖式下跌」。其中一個主因係出口商為咗避開國際關稅風險，上半年大舉出貨「搶出口」，結果變相將下半年訂單透支，出口勢必回落。再加埋房地產行業已經低迷咗五年，樓市成交同樓價繼續滑落，拉低內需。

刺激消費方面，政策效力開始減退，例如舊年搞「以舊換新」，雖然初期見效，但依家已經明顯冇咁大動力。加上通縮壓力仍然存在，PPI（生產者物價指數）持續錄得負增長，企業自然唔敢亂投資。

野村又指，中央喺5月推出《黨政機關節約條例》，嚴打鋪張浪費，間接影響中高端餐飲，特別係酒類銷售下滑最明顯，預測下半年餐飲零售增長由上半年約5%跌到得返1%。

野村中國首席經濟師陸挺話，中央可能會再推刺激政策，例如鬆綁管制或者加大財政支援。不過佢強調，今次經濟問題唔止短期問題，而係涉及深層次結構性挑戰。房地產轉弱已經拖累地方政府財政、消費信心同整體產業鏈，要喺短時間內翻身，難度相當高。