中國外賣平台近期掀起激烈補貼戰，打出「零蚊買」同超低折扣優惠，搞到餐飲業界怨聲四起。有平台聲稱訂單創新高，但實情係商戶做到癲、蝕到入肉，市場秩序一片混亂。

貴州省遵義市紅花崗區餐飲商會率先出手，向美團同淘寶閃購發出公開倡議書，要求佢哋即刻停手，唔好再搞啲連成本都唔夠嘅「癲價優惠」。商會話，「滿18減18」同「零蚊買」啲玩法，搞到好多商戶陷入「唔玩冇流量、玩就蝕本」嘅死胡同，實體餐廳慘過打齋。

倡議書列出三大訴求：第一，停晒啲破價促銷；第二，唔可以違規搞變相價格戰；第三，要建立合理定價機制，最少都要保障成本唔會輸晒。商會仲要求平台唔可以迫商戶一齊夾錢補貼，演算法要公平，俾啲流量支持中小商戶。

內地媒體報道指，依家補貼戰打到火紅火綠，美團、淘寶閃購同京東齊齊推咗啲「0蚊食、0蚊飲」嘅紅包同優惠券。美團喺13號凌晨宣布單日突破1.5億張訂單，「餓了麼」同淘寶閃購亦都話自己14號接到超過8000萬張單。

不過，商戶根本頂唔順。南昌一間奶茶店東主話，雖然生意多咗，但實收好少，「做咗1600單，淨賺千零蚊」，員工忙到唔夠瞓，有啲店甚至提早執笠。蜜雪冰城有老闆話：「日日過千單，根本做唔切，仲要蝕錢。」

網上好多人都話，排隊買飲品要等半個鐘，夜晚十一點外送員仲圍住鋪頭排幾圈。滬上阿姨參加「0蚊奶茶」活動，有員工話有啲免單活動要商戶自己夾錢，每單最蝕得2至3蚊。

除咗人手緊張同蝕錢，仲有唔少浪費情況。有飲品鋪話，收鋪時仲有成堆單未攞，最後幾十杯奶茶要成桶倒晒垃圾桶。有店員苦笑話：「有啲人排太耐唔攞，結果我哋照樣整完就要倒。」