《彭博》引述消息報道，富衛集團（FWD）主席李澤楷原本打算拓展內地保險市場，但計劃最近因其父李嘉誠旗下公司出售海外港口資產而遇阻。有內幕人士透露，自從長和系喺今年3月宣布，將包括巴拿馬運河兩端嘅港口賣畀美資財團之後，中方即刻對李家企業態度轉趨審慎。

消息話，李澤楷早就同內地相關部門傾緊合作，希望透過收購或者夥拍內地保險公司，打開中國市場大門，進一步拓展富衛嘅保險版圖。內地保險市場大、潛力高，一直係富衛重點部署目標。不過，自從長和同美資財團拍板交易之後，中資企業據報接獲內部指示，暫停與李氏家族公司進行新合作，連帶保險牌照談判都即刻踩煞車。

今年3月，長和對外公布，會出售旗下多個海外港口資產，包括控制巴拿馬運河出入口嘅重要港口，畀由美資貝萊德（BlackRock）領軍嘅國際投資集團。呢宗交易一出，即時引起北京高度關注。

其後，內地多份媒體亦提及李澤楷背景，指出佢早喺2000年8月16日，已經辭去和記黃埔副主席同執董職務，自此主力經營科技及金融業務。李澤楷旗下嘅盈科拓展亦多次強調，自己自2000年起就冇再同長和系有任何業務往來，雙方亦冇參與對方決策。

富衛最近先喺香港成功上市，市場原本以為集團可以憑此提升資本實力，加快開拓內地保險市場。不過，依家形勢一變，富衛喺中國業務發展能唔能如期進行，已經變得撲朔迷離。