中共近期釋出訊號，可能準備推出新一輪措施，應對通縮壓力同產能過剩問題，外界普遍認為有助紓緩目前嘅全球貿易緊張局勢。綜合多間外媒報道，習近平同其他高層官員罕有地公開批評唔同行業之間嘅惡性競爭，矛頭直指鋼鐵、太陽能板同電動車等行業。

中共中央財經委員會早前開會，正式承認出現過度產能同市場扭曲等問題，顯示決策層開始正視風險。彭博社引述分析指出，雖然北京暫時未有公佈具體政策，但市場氣氛已經逐漸轉好。

報道又提到，人行（即中國人民銀行）亦罕有地將「價格長期低迷」列為重大挑戰。佢哋喺5月一份報告中指出，喺目前供應同投資為主導嘅經濟結構下，單靠寬鬆貨幣政策好難帶動全面復甦。截至今年6月，工業生產者出廠價格（PPI）已經連跌33個月，按年跌幅達3.6%，係去年7月以嚟最大，遠超市場預期。

除咗金融層面，中國工信部亦有出手，早前同太陽能產業代表開會，又有超過30間建築公司聯署「反內捲倡議」，目標係打擊產能過剩造成嘅惡性競爭。政府仲設立平台，處理供應商喺付款爭拗中嘅投訴，作為整治唔公平商業行為一部分。

花旗集團最新預測指，當局可能會針對煤炭、鋼鐵、水泥等由國企主導嘅行業削減產能，亦會加強民企喺環保、品質、勞工方面嘅規管。地方政府對某啲產業提供嘅補貼同出口退稅都有可能收緊。其實政府早喺去年底，已經對鋁、銅同電池產品調整過退稅安排。

摩根大通嘅首席亞洲及中國股票策略師劉雯迪認為，如果政策落實得當，有助紓緩全球對中國過量產出嘅憂慮，亦有利國際貿易穩定。但佢提醒，政府喺處理通縮壓力同維持就業之間，要小心拿捏平衡，短期經濟增長可能會受壓。

來自英國嘅宏觀經濟顧問公司Pantheon嘅經濟師瑞格利就話，中共今次用字相當罕見，雖然冇明講「通縮」，但已經釋出強烈訊號，顯示官方有意打擊價格戰同產能過剩。

同時，匯豐銀行分析師認為，要刺激中國經濟重拾增長，唔單止靠打擊產能，仲要強化內需，包括強化社保制度、穩定就業同支援樓市等政策，都係唔少得嘅一環。