蘋果公司近年積極喺印度擴展iPhone生產線，不過近日傳出一個可能影響部署嘅消息。根據外媒引述多位知情人士消息，蘋果主要代工夥伴富士康（Foxconn）近幾個月開始安排大批駐印度嘅中國工程師同技術人員陸續返國，引起外界關注，擔心會影響到蘋果喺中國以外建立製造基地嘅步伐，特別係對準備生產iPhone 17嘅進度構成干擾。

據了解，富士康由兩個月前開始，有系統咁通知駐喺印度南部iPhone工廠嘅中國員工返返大陸，而家已有超過300人辦好返國手續。留喺當地繼續工作嘅，大多係台灣支援團隊。由於事件關係到內部人事同戰略部署，相關人士都唔願透露身份。

彭博社早前報道，中國喺今年年初已經內部口頭通知部門，要限制部分技術同生產設備輸出到印度同東南亞。有分析指，中方呢個做法係為咗防止大量企業將生產線搬離中國，希望減慢產業鏈外移速度。

蘋果而家正加快喺印度擴產，富士康亦喺印度南部起緊新iPhone廠房，預計未來幾代產品都會喺當地生產。雖然中國工程人員撤離未必會即時影響產品質素，但有機會拖慢生產流程同組裝速度。知情人士話，富士康過往一直靠中國工程團隊嘅技術經驗去支持新廠起步，今次撤走中國團隊，屬於重大戰略調整。

蘋果行政總裁庫克（Tim Cook）曾多次強調，中國技術人員嘅熟練度同專業精神，一直係蘋果選擇喺中國設廠嘅重要原因，並唔單止因為成本平，而係整體製造環境非常配合。

對於中國工程人員撤出印度一事，蘋果方面拒絕回應，富士康暫時亦未有回應傳媒查詢。不過，呢件事無疑係蘋果全球供應鏈重組過程入面一個新變數。

蘋果近年開始同多間印度本地製造夥伴合作，目標係降低對中國單一市場嘅依賴，逐步將部分組裝業務轉移去印度同東南亞。但今次嘅人事調動亦反映，喺跨區域轉移產能期間，仍然好難完全唔靠中國資深工程師支援，短期內仲未能取代中國喺供應鏈入面嘅關鍵地位。