內地汽車市場競爭愈趨激烈，長三角四地嘅汽車經銷商商會—包括上海、江蘇、浙江同安徽—罕有聯手發公開信，呼籲車廠正視經銷商目前面對嘅困境，狠批部分車廠強迫經銷商以「蝕本價」賣車，涉嫌違反《反不正當競爭法》。佢哋警告，而家嘅情況已經令資金鏈隨時斷裂，整個行業陷入「一賣就蝕」嘅惡性循環。

根據公開信內容，車市所謂「內捲」問題愈嚟愈嚴重，經銷商普遍面對庫存爆倉、現金周轉困難、銷售疲弱等多重壓力。雖然長三角地區第一季汽車銷量佔全國25%，但當地車行普遍叫苦連天，經營環境極之艱難。

信中指出，唔少車廠迫經銷商高價入貨，再用統一售價規定逼佢哋以低於成本嘅價錢賣出去，導致「倒掛」（即入貨價高過售價）情況成行成市。經銷商為咗完成任務，只好咬緊牙關賣車，自吞損失。更慘係，6月起，多間銀行陸續收緊汽車貸款，搞到即使客人批到貸款都攞唔到車，訂單唔單止冇增加，仲大量流失。

同時，銀行對經銷商嘅返利政策都大幅削減，某啲品牌降幅高達11%，即係以往靠「高息高返」頂住場面嘅做法都玩唔落去，銷情自然雪上加霜。經銷商反映，宜家店內人流大跌，成交率更比以前少咗三成，直言：「人唔多、車又多，賣一部蝕一部。」

4間商會促請車廠停止「一刀切」設定銷量目標，應該根據各區實際銷量訂返合理批售計劃，唔好再強制搭售配件，畀返經銷商自主經營空間。同時建議成立價格預警機制，防止跨區銷售同惡性削價，對蝕本車型應該提供專項補貼同清貨支援。

佢哋強調，希望可以同整車廠商共同建立一個「政府引導、行業協調、廠商共贏」嘅新型合作模式，透過區域協作平台分擔風險、共享利潤，提升長三角車市嘅整體競爭力。根據《經濟觀察報》報道，引述汽車流通協會數據，截至2024年，全國已經有4,419間汽車4S店退場，係自2021年以來首次錄得負增長，反映汽車經銷行業正經歷寒冬。