美國總統特朗普早前簽咗行政命令，決定終止對《自由亞洲電台》（RFA）等多間廣播機構嘅資助。RFA粵語組喺昨日（30日）喺社交平台出帖文，宣布由7月1日起停止更新內容，而現有報道會留喺網上，作為歷史資料長期保存。有粵語組記者感慨話：「原來一切只係夢幻泡影」，喺香港新聞自由逐步萎縮之下，失去一個仲可以出聲嘅平台，實在可惜。

RFA粵語組喺帖文《自由亞洲粵語告別讀者》中向所有觀眾、聽眾同讀者講再見，形容粵語組27年嚟為香港同全球華人提供真實、即時新聞同深入報道，而家就到咗一個句號。帖文提到，無論風雨幾大，佢哋始終相信言論自由係應該為所有追尋真相嘅人打開。雖然聲音會暫時沉寂，但對新聞專業同言論自由嘅信念，會永遠留喺每一位同事同讀者心入面。

喺RFA台北辦公室工作嘅記者Tommy（化名）表示，雖然大家早已有心理準備，但臨到最後一日，心情仍難免有啲失落。他話，以前香港仲有幾個平台出聲，「一個喇叭有幾個咪」，但而家「蘋果冇咗、立場冇咗，再到RFA俾人掹線」，形容香港人喺海外發聲嘅空間愈來愈窄。佢感嘆，以後無法再為被通緝或流亡海外嘅香港人講聲，係一種深切無奈。

另一位記者德華（化名）表示，喺香港新聞自由凋零之時，RFA曾經提供一個平台畀記者繼續發聲，「仲可以繼續做新聞」，佢覺得非常感恩。佢話，喺台灣工作期間比喺香港有更多機會出外採訪，曾製作多個專題報道，甚至去過澳洲採訪，呢啲都係一般媒體冇能力負擔嘅資源。佢坦言，從來冇諗過，竟然會因為美國政府突然停資助而告終，形容「真係好唔捨得」。

其實RFA早喺去年已經因為香港新聞環境改變，撤出香港辦公室，唔再保留全職員工。當時保安局局長鄧炳強曾點名批評RFA引述錯誤評論，仲話如果係外部勢力刻意抹黑，即使唔違法，誤導市民都會被政府反駁。RFA則以保障員工安全為理由，全面結束喺本地運作。

RFA喺1996年正式開播，係六四事件後由美國跨黨派議員倡議成立，目的係報道中國人權狀況。其後美國通過《國際廣播法》，由時任總統克林頓簽署法案，撥款3,000萬美元成立RFA。初期用普通話廣播，之後擴展至粵語、維吾爾語等九種語言，多年嚟以多種語言報道中國同香港嘅情況。今次隨住資源削減，RFA整體編製會縮減，粵語組將由7月1日起正式停止更新。