塔利班政權早前同中資合資企業簽嘅阿富汗油田開採協議，最近被正式終止，事件引起外界關注，認為可能反映塔利班政府喺經濟困境下想轉變策略，亦可能對佢哋同中國嘅經貿關係造成影響。

阿富汗礦業同石油部上星期喺社交平台X公布，阿富汗政府已經終止早前同「阿夫欽公司」簽訂嘅25年期《阿姆河油田勘探與生產協議》，理由係對方多次違反合約條款。「阿夫欽公司」係阿富汗國營石油天然氣公司同中國新疆中亞石油天然氣公司（CAPEIC）合資成立嘅企業，中方持股八成，阿方佔兩成。

根據2023年簽訂嘅協議，中方原本承諾投資高達5.4億美元開發阿姆河盆地油田，第一年就要投入至少1.5億美元，並喺三年內創造三千個職位。不過，塔利班政府指承包商未履行承諾，最終決定叫停合作。

曾參與塔利班政府嘅阿富汗前副礦業部長沙姆斯表示，表面上係因為履約問題，但更深層原因可能係塔利班對中國期望過高。他話，自從2021年塔利班重新掌權後，就一直將中國視為可以取代美國嘅靠山，希望可以喺貿易同投資方面搵到突破。不過佢直言，中國其實無可能完全取代美國同其盟友嘅角色。

沙姆斯仲補充，塔利班而家面臨財政壓力，急需搵錢穩住政權，所以對未達標嘅合約就會出手斬纜。他相信，經濟因素係導致合約終止嘅主因。雖然今次中資開油田合作告吹，但雙邊關係表面仲未見裂痕。阿富汗裔美國學者布爾哈尼話，雙方仍然有共同利益——阿富汗亟需經濟支援同基建發展，而中國就希望擴大喺地區嘅影響力。

佢認為，今次合約被終止雖然有象徵意義，但未必會對整體中阿關係構成致命打擊，兩邊仍有合作空間。

即使經濟合作出現挫折，塔利班對中國仍然保持友好態度。喺今個月初，阿富汗副總理哈納菲就出席咗喺中國昆明舉行嘅「中國－南亞博覽會」，並公開表達對中國「一帶一路」倡議嘅支持，顯示佢哋外交上仍然視中國為重要夥伴，希望進一步加深合作。