設於紐西蘭嘅人權評量倡議組織 HRMI 最新年度報告顯示，香港喺多項基本人權表現持續下滑，特別係「政治自由」同「人身完整性」分數明顯偏低，其中「公民同政治權利」方面表現最差，評分淨係高中國0.5分。報告指出，港府近年以國安為名加強監控，包括落實《基本法》第23條、持續大規模國安拘捕，甚至用「勾結外國勢力」等罪名嚟打壓異見，目的係製造寒蟬效應。

報告評估全球38個國家或地區，當中香港喺「人身完整性權利」部分得7.4分（滿分10分），反映市民仍有相當風險會面對任意拘留、酷刑等侵害。「任意拘禁」得分只有4.5分，較去年再跌0.2分，係所有子指標入面最低。雖然香港未出現死刑、失蹤或法外處決，但報告認為任意拘留同酷刑已構成嚴重警號。

至於「公民與政治權利」，總得分進一步跌到得2.4分，喺所有受評地區中敬陪末席，僅略高中國嘅1.9分。報告指出，香港喺「集會與結社自由」只得2.5分、「言論自由」得2.7分、「參政權」得2.4分，三項都遠低國際水平，與越南、中國等威權體制國家幾乎睇齊。報告又指出，香港人均GDP有五萬幾美金，理應可以提供更高人權保障，但實情卻係差天共地。

HRMI 東亞事務負責人潘嘉偉接受訪問時話，雖然香港未到中國咁極端，但發展趨勢令人擔憂，特別係任意拘捕一環，愈嚟愈接近內地做法。他批評港府濫用國安法權力，接連以「勾結外國勢力」名義拉人，已經嚴重侵犯公民自由，又提到國安法下指定法官制度，加上法院經常拒絕保釋，令人質疑本地司法獨立是否仍然存在。

最近駐港國安公署同警務處首次聯合行動，調查6個人同一個組織，但到而家未公開被查者身份或者案情。潘嘉偉形容，做法根本同中國一模一樣，唔單止令案件進度冇透明度，連被捕人士嘅基本審訊權利都保障唔到。他警告，如果以國家安全為由，封鎖所有程序同資訊，香港會愈行愈遠離國際人權標準。

報告同時點名中國，指佢喺「人身安全權」方面淨得2.3分，係所有受評國家中最低。有大量受訪者認為，中國境內人權倡議者、記者、維權人士仍然面對高風險，例如任意拘禁、酷刑對待，甚至法外處決。報告強調，中國人權狀況繼續惡化，制度性侵權問題已成常態。

報告最後總結話，香港本來擁有完善司法制度同強勁經濟基礎，但依家喺政治自由同人權保障方面急速萎縮。即使未出現極端暴力情況，例如法外處決，但對市民基本自由權利嘅打壓，已對社會帶嚟深遠影響。