美國同中國代表團最近喺倫敦進行新一輪貿易談判，重點聚焦喺中國嘅稀土出口限制同美國針對高科技產品嘅出口禁令。美國財政部長貝森特會後話「傾得唔錯」，商務部長盧特尼克就話對話「有成果」。不過中方代表就無就談判內容作公開回應。

有消息人士透露，如果中國放寬對稀土出口嘅限制，美方有機會考慮解除針對晶片設計軟件、噴射引擎零件、化學品同核子設備材料等高端技術產品嘅部分出口禁令。呢啲禁令大部分都係近排美中關係再度緊張之下實施嘅。

彭博社報道話，中國基本上壟斷咗全球稀土供應，四月更加推行新嘅出口許可制度，實際上拖慢咗稀土出口去美國等地嘅速度。稀土元素對全球電子產品產業非常關鍵，包括汽車、手機、電視，甚至癌症藥物同MRI造影劑都需要用到。

美國汽車業界早已感受到壓力。CNN訪問幾位業內人士，佢哋指出，若稀土短缺持續，有機會重演疫情期間嘅晶片荒，汽車價格恐怕會再次飆升。有人匿名表示，依家呢種情況簡直係「升級版晶片荒」，因為幾乎每一部車都涉及稀土部件，由雨刷水馬達到安全帶感應器都唔少得，一旦冇貨，生產會全面停頓。

CNN又報道，福特早喺2019年芝加哥廠房生產Explorer時，就因為搵唔到稀土磁鐵而被迫停產一個星期。雖然福特冇公開證實原因，但業界普遍認為同稀土供應有直接關係。路透社指出，包括通用、福特、Stellantis 等車廠嘅供應商最近獲批最多六個月嘅稀土臨時出口許可。不過，相關公司對呢件事都無公開回應。

有學者指出，雖然地球上有其他地區都有稀土，但提煉同加工過程極之困難同昂貴。目前全球92%稀土加工能力都喺中國手上，而中國亦係唯一一個掌握晒全部加工鏈條嘅國家。科羅拉多礦業學院教授艾格特話，雖然有研究團隊試圖開發例如無需磁鐵嘅電動馬達設計等替代方案，但技術仲有好大限制。