6月8號網上瘋傳兩段影片，揭發有人喺尖沙咀星光大道海濱非法燃放煙花，地點就喺瑰麗酒店對出海邊。片中可以見到有兩道火光升空，煙花喺現場爆開，距離又唔高又唔遠，但當時附近竟然有小朋友經過，有目擊者直言情況好危險。

其中一條片比較清晰，見到一個短頭髮、綁辮子嘅男人，身穿黑衫，背住個黑色背囊同攞住個綠色環保袋，多次用打火機點煙花。成功點着之後佢即刻調頭走，但期間見到有人影相或拍片，佢即刻用普通話講：「不要拍，不要拍」，之後仲走近補多句：「不要拍可以嗎？」

另一段遠距離拍嘅片段就見到現場有五個講普通話嘅人一齊影相，片入面仲有人講「家人們」，疑似一齊嚟放煙花。途人見到有人咁做都覺得奇怪，出聲問：「咩料呀？」拍片者事後留言話，當時有唔少市民圍觀，仲有小朋友喺現場行來行去，覺得好唔安全。

影片引起大量網民熱議，唔少人質疑點解煙花可以帶入香港，仲話：「點解無人捉，無法無天？」有人更激動留言：「今日放煙花，聽日放炸彈！」亦有人諷刺咁講：「天龍人無敵，鍾意玩咩就玩咩，我哋香港人玩就即刻拉。」

發佈第一段片嘅市民話，佢當時一路由瑰麗酒店尾隨涉事男子到K11 MUSEA一帶，先見到對方離開。佢聲稱親眼見對方放至少三枝煙花，懷疑佢褲袋入面仲有煙花未放。佢又話現場其實有管理員喺度，但對方完全冇理，煙花聲響大到震耳欲聾，連警察都唔見有到場處理，令佢覺得非常詫異。事後警方表示已經拘捕一名21歲內地男子，聲稱非常重視事件。

根據香港法例，喺無合法許可下燃放煙花係違法行為。煙花爆竹屬於《危險品條例》下嘅危險品，就算係仙女棒或者滴滴金都可能受規管。根據《危險品（管制）規例》，未經批准擅自燃放煙花，最高可以罰款一萬元。而如果根據《簡易程序治罪條例》處理，如燃放煙花導致危險，最高可以判罰款二千元或監禁三個月。