中國近年以「勞動力轉移計劃」之名，將大量維吾爾族同其他少數民族由新疆送去內地唔同工廠打工，手法被質疑係變相強迫勞動。近日國際多間傳媒合作調查，揭發參與計劃嘅工廠同多個國際大品牌嘅供應鏈有關，包括汽車、電子、家電等行業，當中更涉及LG、三星、大眾汽車等公司供應商。

根據調查，呢批少數民族工人被派去全國唔同地方嘅工廠，包括廣東、江蘇、山東等工業大省，仲有湖北、福建、遼寧、天津、江西、安徽、湖南、重慶等地。武漢一間汽車零件廠嘅保安透露，廠入面超過200名來自新疆嘅工人，全部唔係公司請返嚟，而係由政府統一安排。

外媒喺抖音翻查過萬條片段，推算過去十年最少有11,000人由新疆被調去其他地區工廠打工。記者實地探訪近20間工廠，多名工人話佢哋曾經受到監視，每日開工時間長達12至14小時。雖然收入比新疆高，但有工人都表示迫於無奈選擇留下。

報道引用咗2018年中國南開大學一份研究報告，建議透過擴大所謂「勞動轉移」，嚟降低維吾爾族人口密度，實現族群融合同同化。呢份報告喺中國政府內部流傳甚廣，被指係相關政策嘅重要參考文件。習近平喺2023年8月視察新疆時都提過，要「鼓勵引導」當地人外出搵工，之後地方政府仲承諾要將轉移規模提升超過三成。

研究新疆問題嘅人類學家鄭國恩話，中國政府普遍當未被監禁嘅維吾爾人係潛在威脅，透過呢啲勞動調派方式進行操控。佢強調，呢啲工人根本冇選擇權，唔可以拒絕被調去第二度打工，雖然官方話係為咗扶貧或創造就業，但其實係變相剝奪咗佢哋基本自由，已經屬於強迫勞動。

對於外界批評，中國政府一直否認喺新疆存在強迫勞動。不過早喺2021年「新疆棉事件」爆出之後，國際社會就陸續展開抵制。好似H&M、Nike等品牌都表明唔會再用新疆原材料。同年，美國國會通過《防止維吾爾強迫勞動法案》，全面禁止所有來自新疆嘅產品入口。歐洲議會喺2024年亦通過類似法案，要求封殺所有涉及強迫勞動嘅產品，由歐盟執委會設立黑名單作出監管。

但而家由於所謂「勞動力轉移」已經擴展至全中國，相關產品可能喺唔同省份出廠，再加上供應鏈透明度不足，令消費者根本分唔到邊啲商品係來自強迫勞動。報道指出，西方消費者可能喺毫無知情情況下買咗呢啲問題產品。