美國司法部日前起訴一對中國科學家情侶，指控佢哋涉嫌走私一種具高度農業破壞力嘅真菌入境美國，並準備喺密歇根大學實驗室研究，事件觸發美國國安部門高度警覺。

涉案男子劉尊勇（Zunyong Liu，音譯）去年7月經底特律機場入境時，被海關人員喺佢背囊發現四個用紙巾包住嘅膠袋，入面係「禾穀鐮刀菌」（Fusarium graminearum）樣本。呢種真菌會導致包括小麥、大麥、玉米、稻米等主要農作物感染赤黴病，產生對人類同牲畜有毒嘅黴菌素。根據科學文獻，呢種真菌甚至被列為「潛在農業恐怖主義武器」，每年全球造成損失達數十億美元。案件一曝光，劉即被拒入境，樣本亦已被美方扣押。

劉尊勇最初否認知情，聲稱唔知背包內藏有真菌，可能係其他人放入。不過調查期間佢改口承認，原來係打算偷偷帶入美國，交畀女朋友簡雲清（Yunqing Jian，音譯）喺密歇根大學實驗室內研究同複製菌株。據悉，兩人喺中國都曾從事同類研究。

33歲嘅簡雲清目前係密歇根大學博士後研究員，34歲嘅劉尊勇同佢一樣，依家都被控串謀欺騙美國政府、走私違禁物品同對執法人員作出虛假陳述等多項罪名。FBI調查期間發現，兩人早喺2022年已經用微信商量點樣走私樣本。對話中，劉話會將樣本放入靴子嘅夾鏈袋，簡就回應：「咁樣好，就放鞋入面。」

另外，執法人員喺簡雲清嘅手機中發現佢今年1月簽署嘅工作考核表，當中列明佢係中共黨員，仲寫咗「擁護中國共產黨領導」、「堅決貫徹黨教育方針」同「熱愛祖國」等政治內容。但佢喺申請赴美簽證時卻聲稱研究同禾穀鐮刀菌無關，亦否認知道男友會將樣本帶入美國。

美國聯邦檢察官戈爾頓（Jerome Gorgon）批評呢宗案件對美國構成嚴重國安威脅，指兩人企圖利用密歇根大學嘅科研資源達成研究目的，「其中一人仲係中國共產黨忠誠黨員，佢哋將一種被視為潛在農業恐怖主義武器嘅真菌偷運入美國心臟地帶，影響深遠。」