前支聯會副主席鄒幸彤尋日（1日）喺Patreon發文，話佢會喺6月4日當日喺獄中絕食36小時，悼念呢個日子。佢發問：「一句道歉要等幾耐？」指「天安門母親」等咗36年，仍然無回應，但從未放棄追究政府責任。今年係佢第四年喺監獄絕食紀念六四，每年都會延長絕食時間一個鐘。

自2021年開始被還押喺大欖女懲教所，鄒幸彤形容而家喺香港要堅持正義，就等於向國家暴力挑戰。不過佢仍然希望香港人可以繼承前人勇氣，繼續為真相同公義堅持落去。

佢又提到支聯會被控為「外國代理人」一案終審勝訴，狠批整件事根本係國安以無理控告打壓公民，連起訴內容都講唔清楚。佢認為呢場官司係「一場冤獄」，既然控方提唔出實質證據，政府就應該道歉同撤銷指控，而唔係用技術性理由合理化濫權。

佢質疑，點解「國安」三個字可以壓過一切？警方濫權時，社會竟然唔係諗住制止錯誤，而係點樣改法律去遷就。佢直言，如果呢種情況唔改，香港根本唔可以再叫法治社會，咁樣嘅冤案淨係會一單接一單發生。

鄒幸彤亦提到支聯會仲有一宗「煽動顛覆國家政權案」，控方到今日都未講得清楚被告究竟點樣煽動，但啲人已經坐咗三年幾監。佢質問：「就算最終打贏官司，呢啲打完你一身、先話句對唔住嘅所謂公義，算唔算真正嘅公義？」

佢話喺呢個「新香港」，國安部門已經變成國家意志代言人，唔容挑戰。即使社會不斷倒退，佢仍然呼籲大家要守住基本人性，堅持公義。佢喺勝訴當日喺法庭高呼：「叫鄧炳強道歉呀！」仲重申，就算等幾多年，都唔可以放棄追責。

去到舊年六四前夕，警方首次引用《維護國家安全條例》入面嘅「煽動意圖罪」拘捕8人，包括鄒幸彤嘅媽媽同舅父，話佢哋喺「敏感日子」前喺社交平台發放具煽動性內容，煽動對政府同司法制度不滿。之後，相關嘅專頁「小彤群抽會」都已經被刪除。