內地呢幾年地鐵建設熱潮一直未停，不過近排財政壓力爆煲，好多城市嘅地鐵系統都入不敷支，即使加埋中央政府嘅補貼，都有超過26個城市未能達至收支平衡。各地政府唯有推出加價、減班、節能等措施頂住，但都惹嚟唔少民怨，當中以廣州、佛山、昆明同重慶嘅情況最明顯。

根據內地媒體引用軌道交通研究機構數據，2024年全國地鐵總搭乘人次突破322億，創下新高。雖然搭車人數唔停升，但地鐵建設同營運開支太龐大，票價收入根本唔夠補貼日常開銷，大多數城市都仲要靠中央出錢幫拖。例如，北京地鐵喺2024年就攞到多達248.52億元人民幣嘅中央補助，其他城市如青島、寧波、成都、深圳、鄭州等都各自攞到超過70億元。

但就算補貼咁多，都頂唔順虧損愈嚟愈嚴重。有研究指出，至少26個城市嘅地鐵扣除咗補貼都仲係蝕緊錢。最令人震驚嘅係深圳地鐵，一向被認為係內地營運最叻嘅系統，今年都錄得高達334.61億元人民幣虧損，成為各界熱議焦點。

喺咁大虧損壓力下，地方政府陸續推出應對方案。好似昆明地鐵喺4月開始改票價結構，原本一張飛可以搭更遠，而家就縮短咗里程，相等於變相加價。重慶喺5月29日搞咗公聽會，提議兩個加價方案：一係將起跳價由2蚊加到3蚊，二係縮短每個價段嘅搭乘距離，兩個方案都引起唔少市民關注。

至於廣東省內，廣州同佛山就走「慳電路線」應對危機。廣州近一兩個月唔少市民喺社交平台投訴，話地鐵站入面通風唔夠、有啲燈箱廣告熄咗，搞到車廂又焗又暗，搭車體驗大打折扣。

佛山地鐵就喺5月8日開始全線末班車提早半個鐘收車，班距又拉長，運營時間再縮水。早前佛山亦試過車站燈光昏暗、車廂冇冷氣、扶手電梯停用等情況。有市民表示，以前加班到深夜都仲搭到廣州地鐵轉佛山線返屋企，而家成日趕唔切轉車，唯有叫車或者踩共享單車返去，生活開支加重，仲搞到成日唔方便。