屯門公路喺今個月26號深夜發生嚴重爆水管事件，清水湧上馬路，唔單止令交通大塞車，仲影響到附近多個屋苑同醫療設施嘅食水供應，大批居民受到波及。食水供應中斷咗成七個半鐘，直到第二朝早上大約六點半先至逐步恢復。

爆管位置喺兆康站附近，涉及一條直徑大約900毫米、埋咗喺地下三米深嘅主幹食水管。水務署署長黃恩諾喺28號早上接受電台訪問時表示，條喉管已經有47年歷史，不過佢強調「唔算老」，過往亦冇爆過。佢又話，之前做過滲漏檢查都冇發現有異樣，估計今次係因為「某啲原因」令其中一部分「穿窿」，由於漏點喺深層地下，搵位同維修都比較費時。

黃恩諾話，署方喺27號凌晨發現馬路有滲水，當即展開調查，並封咗部分行車線嚟進行搶修。佢話搵漏點都花咗唔少時間，不過今次受損範圍唔算大，修復工作喺今朝凌晨約3點完成，之後供水逐步恢復，得少量地區話仲未有水。

佢又補充話，啱啱恢復供水嗰陣「水力唔夠」係正常情況，因為「周圍都搶水」，不過去到朝早7點半左右已經冇再收到相關報告。展望將來，水務署計劃喺主幹管安裝感應器，實時監察水壓變化，希望可以提升預警同維修效率，避免同類事故再發生。

不過翻查資料，爆管當日（即27號）政府新聞處發咗39條新聞稿，去到翌日傍晚更加升到54條，但當中竟然一條都冇提過屯門區食水中斷。事件至今冇見有任何官員出嚟開記者會或公開回應，水務署只係透過官方Facebook專頁「滴惜仔」報告搶修進度，令外界質疑政府對事件資訊唔夠透明。今次事件一度影響到屯門區近20萬居民，波及多個屋苑同公共設施，食水中斷超過七個鐘，情況極之嚴重。