中國科技巨企華為近日捲入一單涉嫌向歐盟政界人士行賄嘅風波。比利時檢控部門早前聯同葡萄牙警方，喺今年三月突擊搜查咗超過20個地點，調查華為有冇用非法手段去游說歐洲議會議員，仲懷疑佢哋有向部分議員提供報酬。消息話，當局正重點調查一封由八名歐洲議會議員聯署支持華為嘅公開信。

據知情人士透露，當局其中一種調查手法就係監聽華為職員喺比利時皇家安德萊赫特（RSC Anderlecht）足球隊主場包廂入面嘅對話，仲包括佢哋喺車上嘅交流。報道指出，呢啲監控手段喺類似案件入面屬「相當普遍」。根據掌握嘅資料，華為喺2024/25球季以約5萬歐元（約港幣45萬）租咗個包廂一年，目的係用嚟同歐盟政界人員「初步接觸」，試圖「搏好感」，方便日後游說。

有消息話，華為最初邀請咗幾位歐洲議會助理去睇波，之後再擴展接觸範圍，包括唔同政黨嘅現任同前任議員，甚至歐盟其他機構官員。保加利亞議員尼古拉·明切夫同馬爾他議員丹尼爾·阿塔爾德都承認去過睇波。不過明切夫話，佢係接受咗朋友兼鄰居——一名議會助理嘅邀請，喺2024年10月去睇賽事時唔知道背後係華為安排。阿塔爾德就話，佢喺2024年9月陪兒子去睇波，係應朋友邀請，完全唔知包廂屬於企業，更加唔知與華為有關。

報道又提到，案件亦涉及一間喺布魯塞爾嘅會議策劃公司，該公司高層連同三名華為職員一齊被起訴。截至四月，已有八人被正式落案起訴。比利時當局本週已經正式要求歐洲議會取消四名涉案議員嘅豁免權，以便繼續法律程序。

有外媒評論話，呢單案件突顯中國勢力喺歐洲政界繼續施加影響力，而歐洲議會內部對於賄賂同不透明嘅遊說行為「容易動搖」，反映制度上的確存在漏洞。安德萊赫特足球會方面亦表示，呢個球季完咗之後「無意再同華為續約」。