四川宜賓市屏山縣一間紡織廠日前發生嚴重火警，傳出起火原因竟然同一宗欠薪糾紛有關。涉事嘅27歲男子文某疑似因為被拖欠800蚊工資而情緒失控，闖入廠房縱火，火勢燒足37個鐘，釀成嚴重財物損失，估計損失可能高達幾千萬。

事件發生喺今個星期二（20號）中午，地點係王場工業園入面嘅錦裕紡織公司。根據目擊者同網上片段顯示，事發之前文某曾經同廠方代表就工資問題爆發激烈爭執，期間情緒非常激動，仲講咗句：「我仲有無得生存唔重要，但我要你死。」火災發生後，大批消防員即時趕到現場撲救，直到第二日先完全控制火勢。

屏山縣公安喺22號凌晨發通報，證實文某已經被刑事拘留，案件仍然調查緊。警方表示會深入調查佢縱火嘅動機同整個案發經過，但暫時未有交代涉事企業有冇違規情況。

有網民喺社交媒體透露，文某出身貧窮，屋企狀況唔好，媽媽患病急需用錢，果800蚊對佢嚟講係救命錢。有網民感慨：「一個人為咗800蚊燒廠，心要幾絕望先會咁做？」事件引起社會對勞工權益、社會保障同法律制度公平性嘅激烈討論。

「800哥」一詞迅速登上熱搜榜，有人將佢視為揭露底層勞工困境嘅「英雄」，認為佢嘅行為反映工人討薪無門。但亦有人批評佢做法太極端，唔單止破壞財產，仲可能害到其他人，唔值得提倡。有市民擔心：「老細冇錢還，幾百個工人冇晒工開，之後點算？」

錦裕紡織喺2019年成立，屬於浙江嘉興對口援建項目之一，曾被視為振興當地經濟同就業嘅示範企業。本台多次致電該廠同屏山縣政府，惟電話無人接聽，官方到而家都未作出回應。

喺四川事件發酵嘅同時，全國唔少地方都頻頻爆出勞資糾紛。同樣喺5月22號，深圳美的洗悅家有工人討薪討咗9個鐘都冇結果，甚至傳出有人揚言跳樓；山東濰坊一間鄉鎮衛生院嘅員工話俾人拖薪半年，最近仲要被減人工。有工人無奈話：「真係唔知仲可以點樣捱落去。」而浙江同湖南一啲中建項目亦被揭發長期欠薪，引起社會高度關注。