香港樓市持續低迷，近排唔少本地富豪陸續賣出持有多年的豪宅，引起市場高度關注。包括有「磁帶大王」之稱嘅陳秉志，同埋紀惠集團有限公司行政總裁湯文亮，都相繼拋售自住樓同商業資產，有啲成交價仲遠低過當年買入價，反映本地樓市壓力未有舒緩。

陳秉志位於薄扶林域多利道188號嘅獨立屋，早前畀接管人接收，近日正式放盤，估值約4.3億元，平均呎價大約70,689蚊。呢間屋係陳家自上世紀80年代以嚟嘅長期居所。陳秉志接受訪問時透露，因為還唔到銀行本息約3.5億元，呢間豪宅早喺2023年底已經開始放售，但一直未成交，結果上個月被接管。

資料顯示，陳秉志喺2017年曾經夥拍其他投資者，以402億元買入中環中心75%業權，其中佢本人持有7層。不過近年寫字樓市道低迷，加上佢高槓桿操作失利，資產大幅縮水。

至於湯文亮，就同佢姐姐廖湯慧靄喺今年一共賣咗約22億元資產，包括住宅、辦公室同舖位。其中包括佢以1.38億元賣出嘅陽明山莊頂層相連單位，帳面賺約3,650萬元。雖然佢過去曾喺專欄呼籲市民「唔好賣自住樓」，但最終自己都選擇賣出。佢近日又以3,880萬元出售中環喜訊大廈地下B舖，對比2011年購入價7,280萬元，貶值接近一半。《彭博》曾聯絡湯文亮，但未獲回應。

報道指，香港正出現一波豪宅急售潮。雖然借貸成本近排稍為下調，不過根據中原城市領先指數，住宅樓價仍處於八年以嚟嘅低位。高力國際更加預測，今年甲級寫字樓空置率將會繼續上升，租金可能下調8%至10%。

除咗陳秉志同湯文亮，富豪何崇本喺舊年亦傳出出售山頂七幢豪宅，為咗償還私人貸款。有分析認為，雖然香港樓市仲有部分受惠於中國人口流入同投資者支持，但喺寫字樓冷清同財政壓力加劇之下，一啲富豪可能都要賣樓套現。

根據金管局最新數據，截至今年3月底，本港住宅按揭負資產個案升至40,741宗，係自2003年沙士以嚟新高。翻查資料，目前樓價比2021年高位下跌咗29%。