內地經濟表現備受關注，最近中國國家統計局罕有地公開承認，七個省市出現統計數據造假，引起社會廣泛討論。被點名嘅地方包括江蘇、浙江、遼寧、山西、海南、重慶同寧夏，而中央部門方面，科技部、市場監管總局同金融監管總局都係被督查對象。當中江蘇問題最嚴重，據報地方政府曾干預上報數據，甚至要求企業提供虛假資料。

根據國家統計局最新公布，自去年11月尾開始，十個督察組已分赴上述省市同部門進行常規統計督查。結果發現，多個地方出現數據造假、行政干預統計工作，仲有地方政府向企業「落order」，要佢哋報唔真實嘅數據。浙江、遼寧、山西同重慶等地都有類似情況，當中以江蘇問題最為嚴重。

今年1月，江蘇省統計局同國家統計局江蘇調查總隊仲搞過聯合記者會，聲稱2024年江蘇GDP達到13.7萬億元人民幣，按年增長5.8%，成為全國第二，增量仲係全國第一。消息一出，網上即刻爆起「江蘇超車」、「廣東危機」等討論，炒熱咗江蘇經濟數據可信度嘅爭議。

有評論認為，統計數據應該以真實為原則，係政府政策制定嘅基礎，數據一旦造假，唔單止會影響決策，仲會破壞政府同公眾之間嘅信任。過去幾年，雖然中國經濟壓力大，但各省數據每年都準時「達標」，外界一直質疑背後是否有「注水」。

另外，唔少地方政府透過「數據修正」嚟調整增長率，引起新一輪爭議。好似河南，喺去年1月突然將2022年GDP數字下調超過3100億元人民幣，令原本負增長3.6%變成正增長4.1%。福建、江西、湖南亦有類似操作，調低前一年數據後，當年增長率即時「翻倍」。

內地官媒都引用報告指出，統計數據嘅真實性係經濟社會發展嘅「晴雨表」同「指南針」，一旦出現失實，就可能誤判形勢，甚至引發地方之間互相攀比，搞「假數據競賽」，為國家帶嚟更大嘅系統性風險。