中國多個地方最近掀起一波「討薪潮」，由建築工人、教師、醫護人員，到環衛工人，都紛紛走出嚟表達對拖欠工資嘅不滿。據了解，事件涉及河北、廣東、廣西、山東、山西、黑龍江、四川、江蘇等多個省市，反映基層勞工喺而家經濟壓力下，生活愈嚟愈困難。

喺河北石家莊，中交集團旗下項目喺5月18日爆發集體討薪，工人拉起橫額抗議話長期無糧出，有人透露自從過完年到而家都仲未收到薪金，公司雖然多次話會發人工，但次次跳票，仲有人屋企有病人急住用錢。廣東陽信高速亦有類似情況，中鐵七局項目嘅工人圍住辦公室要求出糧，片段中見到工人無奈咁話連幾時出糧都唔知，只可以日夜守喺簡易板房等消息。

廣西南寧亦有32位工人因被廣西送變電建設有限公司拖糧，自5月16日起紮營抗爭，仲要喺戶外煮飯準備長期抗戰。四川遂寧市有保安因為介紹佢哋返工嘅中介走佬，搞到要舉橫額喺商場門口追薪。江蘇南通、浙江金華、黑龍江七台河等地都出現同類情況，涉及物流、速遞、工廠員工甚至失業工人，有啲人話已經三個月無收到應有津貼或社保。

討薪情況仲蔓延到教育同醫療界。山東棗莊市有唔少編外老師由舊年尾開始就無糧出，有人話月薪得三千幾蚊，半年靠借錢度日。山西一啲教師就爆料話學校要求佢哋退返自2021年以嚟發放嘅年終獎同課後服務費，引起唔少反彈。

社交平台上，有來自甘肅嘅護士發帖話自己月薪得1300蚊，仲有四個月無收過任何績效獎金，生活難以維持。江西一位環衛阿姐更加情緒崩潰，話自己每日凌晨五點開工，連續做十幾個鐘，月薪得1400蚊，喊住話「下世唔想做人」。

另一方面，浙江金華永康市古山鎮墁塘村村委會強收「衛生管理費」同「停車費」引起民憤。村委會喺5月中發出通告，話由5月10日起，所有常住居民同打工仔都要交錢，大人每年80蚊、細路40蚊、每架車收500蚊，唔交就有機會畀人鎖車，仲要補交罰款。通告更講明，撬鎖會當破壞公物處理。

唔少村民強烈反對，話完全無徵求居民意見就擅自收費，簡直係「明搶」。有街坊話一家五口一年要交400蚊，根本負擔唔起；有外地租戶表示，以前收費係按戶計，依家變做人頭制，簡直唔合理。有維權人士指出，村委會係基層自治組織，如果冇《收費許可證》就屬於違法，仲可能涉及村幹部同佢哋家人中間嘅利益輸送。

對於外界關注，古山鎮政府綜合治理辦承認收費措施喺網上引起好大爭議，但話傳媒採訪要報上市委宣傳部，暫時未能直接回應，到而家政府都未有清楚講明收費是否合法。