美國國會對香港官員嘅制裁再進一步，繼眾議院早前提出相關法案之後，參議院喺今個星期亦正式提出《香港司法制裁法案》，針對多名參與執行《港區國安法》嘅法官同檢控官。提出法案嘅參議員包括民主黨同共和黨人士，有沙利文、默克利同柯蒂斯，反映喺制裁港官呢個問題上，國會已經形成跨黨派共識。

根據法案內容，美國總統要喺法案通過後180日內，審視名單上嘅特定香港官員係咪涉及侵犯人權，並決定會唔會根據《全球馬格尼茨基人權問責法》、《香港人權與民主法》或者《香港自治法》對佢哋實施制裁。制裁內容包括凍結喺美國嘅資產，亦禁止任何美國人或公司同被制裁人士有任何交易往來。

今次法案點名嘅官員多達45人，包括終審法院首席法官張舉能、高等法院法官陳慶偉、陳仲衡、李運騰、杜麗冰、伍淑貞、鄭利明同陳嘉信等等。刑事檢控專員楊美琪同副檢控專員周天行亦喺名單之內。文件指出，呢啲司法官員係推行國安法過程中擔任重要角色，有份壓制民主派人士。

參議員沙利文狠批中國共產黨，話中共打壓異見唔再局限喺中國本土，美國人同合法居民都成為受害者，香港嘅司法體系已經被「徹底腐化」，變成咗一件打壓工具。默克利就表示，美國唔會對中國破壞自由同自治坐視不理，「無論呢啲鎮壓發生喺中國入面定外面，美國都絕對唔會接受。」

共和黨參議員柯蒂斯亦表示，呢條法案要求美國行政部門認真檢視，等參與打壓香港民主運動嘅人要為此付出代價，強調美國保護人權同自由係堅定不移。

除咗司法制裁法案，幾位參議員今個星期仲同步提出一項決議案，強烈譴責中國政府喺海外對包括美國公民喺內嘅人所進行嘅打壓、威嚇同脅迫行為。

其實美國制裁香港官員唔係第一次。早喺2020年7月，當時總統特朗普已經引用《行政命令13936》，對11名港官實施第一輪制裁，指佢哋推動或者執行《港區國安法》，打壓港人言論自由、集會自由同民主權利，損害法治。嗰份行政命令甚至將香港形容為「國家緊急狀況」。

拜登上場後都冇收手，喺2021年3月根據《香港自治法》再推第二輪制裁，名單增至24人，指佢哋對中國違反《中英聯合聲明》同《基本法》負有重大責任，導致香港民主倒退得更嚴重。

今次參議院提出新一輪制裁行動，正正係緊接眾議院嘅步伐。今年1月，眾議員金映玉同吉姆·麥戈文就已經提出類似法案。國會兩院相繼出招，代表住美方對制裁香港官員嘅立場唔單止冇軟化，仲越嚟越強硬，仲有可能會再升級。