河北邢臺南宮市一間民辦學校「豐翼小學」近日爆出突被勒令停辦，引發超過一千名學生家長走上街頭，聚集喺市政府前抗議，場面連續幾日都非常緊張。喺上星期四（5月15日），當地政府終於出面宣布「學校唔會關閉」，事件暫時平息。不過，今次風波突顯咗中國民辦教育政策日趨收緊，亦引起唔少社會不安同爭議。

大批家長喺5月11日聚集喺南宮市政府大樓前，高聲要求政府撤回關閉學校嘅決定。有現場影片見到，家長不斷高呼「唔同意」、「領導出嚟」，情緒激動，場面一度混亂。當晚抗議一直持續到深夜，當局派咗大批警察駐守現場，仲封鎖咗廣場四周道路，同時熄咗附近燈光，以防混亂升級。到第二日，仲有唔少家長繼續留守，表達不滿。

出事嘅豐翼小學屬於當地豐翼教育集團，位於南宮市經濟開發區，涵蓋小學等多個學段，一直以教育質素高而深得家長信任。有家長話，學校係用公開搖號入學，好多家庭都係睇中教學水平先報讀。今次事件突然發生，搞到家長措手不及。一名唔願具名嘅家長話，佢哋唔能夠接受將學生分流去「管理混亂、師資唔穩」嘅公立學校，批評當局處理粗暴，直指係針對民辦學校：「學校辦得好，就想封殺，實在唔公平。」

南宮市政府辦公室一名官員證實，日前確實有超過千名家長到政府樓下示威，佢表示事件已經處理完畢，學校唔會關閉，但對細節避而不談，話一切安排由教育局負責，自己唔清楚內容。

根據中國教育部喺舊年十月公佈嘅《2023年全國教育事業發展統計公報》數據，過去四年全國民辦學校數量已經減少咗超過兩萬間，單單喺2023年就有一萬一千間民校被關閉。其中，義務教育階段民辦學校減少咗425間，在校學生數目少咗超過134萬人。呢啲變化都同中央收緊民校政策、限制民辦教育發展密切相關。

喺咁嘅大環境下，豐翼小學呢單風波被外界視為整頓民辦教育行動嘅又一例子，亦令家長對民校未來嘅擔憂進一步升溫，擔心高質素學校反而成為政策清算目標，民辦教育正逐步被邊緣化。