美國同烏克蘭最近嘅關係再有變化。美國總統特朗普原本對軍援烏克蘭持保留態度，一度暫停晒所有軍事支援嘅安排，但喺雙方喺上個月30號簽咗一份具有戰略價值嘅礦產協議之後，特朗普立場突然轉變，批准一項高達五千萬美元嘅軍事出口許可，標誌住佢第二任期以嚟首次對烏克蘭作出實質軍事支援。

根據美國外交關係委員會收到嘅資料顯示，國務院已經簽署一份編號EC-859嘅備忘錄，正式通過以「直接商業銷售」（DCS）方式，向烏克蘭輸出軍事裝備同技術服務。唔同於傳統軍售（FMS）程序，DCS唔需要對外公開細節，所以目前外界都唔清楚美方會提供啲咩類型嘅軍備。不過呢個安排已經清楚向外界發出訊號，顯示美烏軍事合作開始恢復。

另一方面，呢項軍售亦都同最近簽訂嘅礦產協議有密切關係。據《衛報》報道，烏克蘭總統澤連斯基喺5月1號透露，佢喺教宗方濟各嘅葬禮期間同特朗普喺場邊進行咗短暫會晤，討論咗多項經貿同軍事議題，最終促成咗新嘅礦產合作。澤連斯基表示，今次嘅協議條件比預期更加有利，而美方隨即批出軍事出口許可，外界普遍認為係會面嘅直接成果之一。

雖然特朗普政府曾經暫停晒所有對烏軍援計劃，外界一度擔心美國會徹底撤回支持，但實際上，美方一直未完全中斷對烏軍售。根據Tochnyi研究機構嘅分析師Colby Badhwar分析，DCS軍售一般都好低調，唔使對外交代內容，所以好容易唔畀人發現。佢認為美國其實一直暗中維持對烏克蘭嘅戰略支持。

同一時間，烏軍亦加強對俄羅斯佔領區嘅反擊。喺當地時間5月1號晚，烏軍針對克里米亞多個軍事目標發動空襲，攻擊地點包括貝爾貝克、卡查、新費多里夫卡同華迪斯克機場等，行動持續到深夜。根據消息來源「NOELREPORTS」透露，呢次行動明顯加大咗對俄方嘅軍事壓力，亦令當地市民對安全形勢更感不安。

澤連斯基早前曾經向美方提出，希望可以採購總值介乎三百億至五百億美元嘅防空系統同重型武器，以應對持續惡化嘅戰爭壓力。另外，美國國務院發言人布魯斯（Tammy Bruce）表示，美國唔會再擔任俄烏戰爭停火調解人嘅角色，未來將交比俄羅斯同烏克蘭決定。

有觀察認為，隨住美國對烏克蘭政策進一步轉向深入戰略合作，未來雙方喺軍備同經濟資源上可能會更加緊密。不過，呢個趨勢同時亦意味住俄烏戰爭可能會持續升級，短期內恐怕都睇唔到和平曙光。