一名19歲嘅港男，喺大球場睇港隊對伊朗隊波嗰陣，俾人指控喺播中國國歌嗰陣背向草地，畀控方告佢侮辱國歌罪。案件喺今個星期三（30號）喺東區裁判法院開審，裁判官林子康聽完控辯雙方陳詞之後，裁定表面證供成立，案件押後到5月23號再審，等控辯雙方作結案陳詞。

控方讀出案情指，事發喺2024年6月6號晚8點，係大球場舉行嘅世界盃同亞洲盃外圍賽第二圈，由香港主場對伊朗。開波前，場館播咗兩隊嘅國歌——伊朗國歌同中國國歌，仲透過廣播提醒觀眾要起身致敬。被告劉本晞當時著住紅色波衫、灰短褲同運動鞋，坐喺主場東翼第一排。

警方指，當晚由指揮官林景昇同幾位軍裝警員喺場巡邏，並用攝錄機影低觀眾區情況。控方喺庭上播出案發片段，林景昇話，伊朗國歌播緊時，被告起初有望住草地，但去到尾段就轉身背住草地。去到中國國歌播出嗰陣，被告又再背向草地，個頭微微垂低，雙手垂喺身側。之後，林喺8點37分喺看台截停被告，帶佢入場內警務室，最後正式拘捕。

辯方就質疑警方證據唔夠實在，又指出警方根本冇影到播伊朗國歌時嘅情況。林就解釋話，侮辱外國國歌喺香港唔算係刑事罪，所以冇影。辯方仲指出，有觀眾喺播伊朗國歌前發出噓聲，但林就話現場人多聲音雜，佢冇特別留意。

辯方再問林景昇，國歌聲係咪來自場館四周唔同方向，而唔一定係正面草地方向，林表示認同。辯方再提，當時包括警員、保安等人都有背向草地，但無一人被控。林亦承認，指佢哋係因為履行緊職責。

被告選擇唔作供，辯方傳召咗一位證人，證人證實自己之後曾再入大球場睇波，拍咗擴音器實際位置，證明國歌聲源唔係單一方向。辯方最後指出，控方未講清楚到底被告邊個行為先算「侮辱國歌」，估計係指「背向草地」，並要求控方喺書面陳詞入面進一步交代清楚。被告目前繼續保釋候訊。