一單涉及200億人民幣嘅金融詐騙風波，最近再一次引起社會關注。山東江海彙集團「爆雷」之後，董事長同佢老婆一齊潛逃去咗海外，成萬計家庭損失慘重。事件越滾越大，內地有唔少儲戶只係轉發咗外媒報道，或者接受咗訪問，就俾警方話佢哋「被境外反華勢力利用」，以呢個理由拉咗佢哋去做行政拘留，引起社會對言論打壓同信息封鎖嘅高度關注。

啲受害人透露，江海彙出事之後，佢哋唔知搵過幾多部門，包括中紀委、公安部等，希望可以徹查真相、追回巨額資金。但結果就係唔少人越維權越出事——俾人叫去問話、被人監視，甚至直接拘留。王女士（化名）話，就喺濰坊、棗莊嗰邊，已經有十幾個儲戶，單係因為轉發報道或者聯絡外媒，就畀公安拉咗去。當地警察仲攞住外國網站啲報道做證據，話佢哋「俾外國勢力利用咗」。

江海彙爆雷係去年開始，據講牽涉超過6萬名儲戶，連埋家人，大概十萬人一路喺度維權。集團董事長安志斌同老婆周春衛喺事件爆出之後就飛咗去美國，有人懷疑佢哋可以咁順利出境，係因為有高層官員保護。受害人咁多年都追唔番啲錢，不停寫信比政府，要求幫手平反。

根據儲戶嘅聯署信，佢哋質疑山東警方將案件定性為「非法吸收公眾存款」，完全唔符合實情。佢哋話呢啲其實應該係「合同詐騙」，因為江海彙有持牌、有交稅、年年有年檢，地方政府仲公開鼓勵大家投資。佢哋喺信入面直情問：「邊有政府收保證金就係非法集資？邊有官員站台會係非法集資？」

信入面仲提到，「應急轉貸」本身係山東省推動嘅政策，目的是幫民企解決短期資金壓力。有好多政府部門一齊出文件，證明呢啲係官方主導政策，政府唔止係參與者，仲係管理者。儲戶話：「我哋信政府先會借錢出嚟，希望政府可以還我哋一個公道。」

其實，江海彙並唔係唯一一單。網民喺社交平台爆料，4月22號中融信託又出事，大批受害人走上北京維權，結果俾公安拉晒走，當中包括老人、婦女同埋病人，仲爆發咗肢體衝突。而喺3月25號，另一單海銀詐騙案嘅受害人喺上海上訪，都面對粗暴執法。呢啲事件令社會更加關注，中國金融監管有冇問題，同時又令大家質疑，維權人士喺內地仲有冇空間發聲。