「國際調查記者同盟」（ICIJ）聯同全球42間傳媒機構，花咗10個月時間做深入調查，發表咗一份名為《中國箭靶》（China Targets）嘅重磅報道，爆出中共點樣將打壓異見者嘅手段全球化，唔止係針對個別人，仲建立起一套跨國、有系統嘅維穩網絡，滲透層面由國際組織伸延到民間監控，令全球異見者處境變得前所未有咁危險。

多位流亡海外嘅港人同中國維權人士向ICIJ表示，中共喺海外嘅打壓唔係零星事件，而係有組織、有計劃進行。佢哋話自己喺外地被中共人員監視、跟蹤、騷擾，連喺香港或中國內地嘅親人都被公安、國保帶走問話，明示要佢哋「收聲」，唔好再喺國際發聲。有住喺法國巴黎嘅藝術家江盛達就透露，多次喺屋企外面發現有陌生人守候，佢屋企人亦受到威脅。

報道指出，中共滲透手段包括民間社團、學術機構，甚至滲透到聯合國、國際刑警等組織。有超過60個聲稱係中國非政府組織（NGO）嘅團體，實際上與中共政權有直接關係，部分仲收中共資助、由官員親自擔任高層職位。呢啲組織唔單止壟斷聯合國人權會議嘅發言機會，仲會阻撓異見者出席會議，喺會場偷拍甚至進行恐嚇。報道形容，日內瓦已經變成「中國嘅遊樂場」，特別係涉及新疆、香港等敏感議題嘅人權倡議者更係首當其衝。

調查又揭發，中共濫用國際刑警「紅色通緝令」制度，對全球異見人士發出通緝，並向當地警方施壓要求配合。由2019年至2024年，習近平訪問外國期間，至少有7宗當地示威者被警方無理拘捕嘅事件。報道指出，呢種跨國打壓模式已經成為常態，而中共亦愈來愈識利用外交、經濟影響力達成目的。

除咗官方機構外，中共仲大搞資訊戰對付異見聲音。報道話，北京透過「五毛黨」、水軍、大V同親共媒體大舉散播民族主義同假資訊，仲會暗中挑起極右勢力同當地社群之間嘅矛盾，將異見者塑造成「外來威脅」，鼓動群眾發動攻擊，令真正幕後黑手可以卸責。

例如喺英國流亡嘅羅冠聰同劉祖廸就成為目標之一。據講，喺「南港刺殺案」之後，網上出現大量假消息，將件事同香港移民掛鈎。短短三日內，就有29個帳戶發咗超過150則針對香港流亡者嘅帖文，指控佢哋帶嚟難民潮、破壞治安，激化當地對港人嘅仇恨情緒。有反種族歧視組織聯同英國媒體指出，呢啲手法同中共嘅資訊戰極為相似，顯示背後可能有計劃操控。

ICIJ透過過百名異見者訪談、數百份內部文件、審訊錄音、影像證據同情報報告，揭露中共嘅維穩體系已經由國內伸展到海外，涉及最少23個國家或地區。中共滲透範圍包括聯合國、國際刑警、NGO、海外警察站，仲利用社交媒體煽動民情。報道總結，呢套體系唔再只係政治打壓，仲結合輿論操控、法律工具、滲透同暴力威嚇，已經變成中國對外輸出嘅新式極權統治手段。