美國總統特朗普再度發炮，矛頭直指聯儲局主席鮑威爾，公開要求立即減息，否則警告美國經濟將面臨放緩風險。

特朗普喺社交平台發文指出，現時能源、食品價格已經顯著回落，其他物價指標亦開始轉弱，形容呢個係「非常好嘅現象」，亦證明佢一早預測正確。他用上「太遲先生」（Mr. Too Late）同「大輸家」（Big Loser）來形容鮑威爾，狠批對方動作慢，認為除非而家即刻減息，否則將會壓抑經濟動力。

佢更加聲稱，鮑威爾一向慢三拍，除咗喺選舉期間減息「幫拜登同賀錦麗助選」之外，其他時間都遲遲唔出手，並反問「結果如何？」

聯儲局將於下月6至7日召開新一輪議息會議，市場普遍預期將會維持現行利率不變，聯邦基金利率目標區間預料維持喺4.25厘至4.5厘。

另外，芝加哥聯邦儲備銀行行長古爾斯比（Austan Goolsbee）指出，聯儲局需要更長時間觀察特朗普經濟政策對實體經濟嘅具體影響，尤其關稅措施雖未必對整體宏觀經濟構成大威脅，但對供應鏈影響幾何仍然屬未知之數，因此主張採取更穩妥策略，等數據更清晰先再行動。

特朗普再度抨擊聯儲局主席鮑威爾，加劇投資者對聯儲局自主性的擔憂，困擾市況。美股顯著下跌，3大指數都跌超過2%，道瓊斯工業平均指數最多跌超過1300點，收市仍跌近1千點。