警方今日（22日）起喺港島四個交通違例黑點，試行以錄影方式執法，透過運輸署現有嘅監察系統，記錄違例車輛車牌，之後向司機發出定額罰款通知書。

首階段涵蓋四個交通黑點，包括皇后大道中與雪廠街交界、皇后大道中與畢打街交界、皇后大道中與文咸東街交界，以及皇后大道東與黃泥涌道交界。警方表示，試行期為三個月，完成後會檢視成效，有需要嘅話唔排除擴展至其他地點。

警務處交通總部交通管理組警司聶凱鵾今日喺本台節目《千禧年代》解釋，警方過往都有派人巡查上述地點，但執法人員一走，違例情況好快就「打回原形」，效果唔持久。佢指出，依家運輸署嘅閉路電視解像度已足夠清晰，可以睇到車牌，今朝開始已經有警員駐守控制台，透過錄影裝置發現違規行為就即時跟進。

警方今次主要針對嚴重影響交通流暢同安全嘅違規行為，例如喺限制區違泊、喺黃格位停車等，因為呢啲情況往往容易引發嚴重擠塞甚至意外。

有聽眾關注點解唔24小時執行，聶凱鵾解釋話，每日都有唔同程度嘅違例情況出現，警方並非要「捉曬所有違例者」，而係集中資源處理對道路使用者造成實質危險或嚴重阻礙交通嘅情況。舉例話，中區喺收工之後或者凌晨時段，如果違例行為冇構成嚴重影響，警方就唔會優先處理。

佢又補充話，暫時未能透過錄影系統處理行人違規，因為系統唔具備人面識別功能，即使拍到違規行為，都追查唔到涉事行人身份。

同場參與節目嘅港島西立法會議員陳學峰就話，今次試行嘅幾個地點一向都有違泊問題，需觀察一段時間先可以睇到成效。佢指出，如果有司機屢次違規但未即時收到告票，可能會以為「有機可乘」，變相削弱計劃成效。

警方強調，今次試行目的唔係懲罰司機，而係希望透過技術手段加強執法效率，令市區交通更有秩序，呼籲駕駛人士自律守法，齊齊維持道路安全。