英國外交部喺星期四（27號）向國會提交咗第56份《香港半年報告》，覆蓋2024年7月至12月期間香港情況。報告直言，北京未有履行《中英聯合聲明》承諾，香港自由同權利不斷受壓，「一國兩制」被嚴重侵蝕。英國政府強調會繼續支持港人，並要求中方履行國際責任。

報告提到，去年12月係《中英聯合聲明》簽署40周年，英方特別回顧香港嘅歷史地位同同英國嘅緊密聯繫。不過，自從《港區國安法》實施以來，北京已經大大削弱咗香港嘅高度自治。報告特別提到包括黎智英喺內，一共有45名民主派人士同社運人士被判刑，指黎智英喺健康惡化下仍被起訴，引起國際社會多次呼籲釋放；而兩名前《立場新聞》編輯被定罪，亦顯示新聞自由正受到打壓。

報告又提到，由2019年反修例運動到依家已經5年，仍然有大批被捕人士未被起訴，處於法律不明朗狀態，批評港府做法違反《基本法》同國際人權標準。英方對港府越嚟越頻繁進行「跨國打壓」表示憂慮，尤其係去年平安夜，港警向多名流亡英國嘅港人發出通緝令，只係因為佢哋喺英國表達意見。報告重申，英國唔會容忍外國勢力喺本土騷擾或恐嚇任何人。

英國首相同外交大臣都曾親自會見呢批被通緝嘅港人，聽佢哋講經歷，並關注跨國打壓對整個港人社群造成嘅「寒蟬效應」。英方表明，會繼續支持超過20萬名已定居英國嘅港人，肯定佢哋對英國社會、經濟同文化作出嘅貢獻。

英國政府重申，會繼續推動中國履行聯合國人權理事會提出嘅建議，維持英國國民（海外）護照（BNO）簽證計劃，為港人提供一個安全嘅家園，並強調：「無論今日定將來，英國都會與港人同行。」

報告亦指出，保障國家安全係合理，但唔可以成為打壓人權嘅藉口。根據國際標準，用「國安」理由去限制言論自由，必須符合「煽動即時暴力」先算合理，否則就係侵犯自由。作為《中英聯合聲明》共同簽署國，英方話會繼續監察香港情況，並追究中方喺國際條約上嘅法律責任，確保港人基本自由同權利唔會被漠視。