港人北上消費風潮愈吹愈盛，反觀香港本地零售業繼續疲弱，內地電商巨頭京東就喺呢個時候高調進軍香港，引發全城關注。曾多次「隔空交火」嘅HKTVmall創辦人王維基，昨日（27號）出席業績發佈會時就話自己唔驚競爭，仲講明會堅守「賣真貨」底線，並宣布即將推出簡體字版網站，同時引入幾百間中國商戶，吸納內地消費群。

王維基直言，港人北上買嘢已經成為新常態，集團會靠減舖、控租來減壓，門市數量由前年90間縮到依家得返73間。雖然公司去年蝕咗6,670萬，但為咗慶祝HKTVmall十周年，照樣派出每股38仙特別股息。

面對京東入場搶客，王維基冇手軟，喺Facebook開Post寸京東App抄HKTVmall：「幾好笑，堂堂京東App八九成都係抄我哋HKTVmall，圖案都『學』得十足十，真係多謝抬舉。」喺業績會上佢又補充話：「我當年要抄功課，都一定抄成績最好嗰個，所以冇問題啦。」

至於京東標榜嘅「買貴就賠」策略，王維基就覺得無補於事，認為咁樣做唔能夠真正建立顧客信任。佢強調HKTVmall會堅守真貨原則，提供可靠服務，而為咗搶攻內地市場，更計劃推出簡體字版網站，引入大批內地商戶，拓展新客源。

雙方你一言我一語，火藥味愈來愈濃。王維基出Post後，京東港澳官方Facebook即刻回敬：「既然王生開咗個頭，我哋都好樂意同你比下邊個對客更好」，仲強調會用免費上門安裝回應挑機。之後再發文話：「恭喜HKTVmall毛利率超過25%，利潤豐厚。京東自營毛利率只有約10%，大家覺得邊個平啲？」最後再加多句：「京東願意同香港同行一齊加油，為香港市民提供更好商品、更低價格、更好服務。」

呢類「惹火宣傳」策略其實唔算新鮮，早前送餐平台Keeta就曾經喺網上挪揄競爭對手Deliveroo結束營運，一樣係靠落井下石吸眼球。不過今次戰火明顯升溫，有分析就話，京東同HKTVmall兩大平台短期內會正面交鋒，香港網購市場可能會變成「雙雄割據」局面，一場新世代電商之戰已經正式打響。