英國《星期日郵報》早前爆料，指一封由英國外交部中國事務副主任喺去年8月發畀駐港高級外交官嘅電郵顯示，英國外相林德偉（David Lammy）曾經就滙豐控股（HSBC）拒絕發放移英港人強積金一事，親自向滙控主席杜嘉祺（Mark Tucker）表達關注，事件已經升格到英國政府高層處理。

英國外交部已經確認，當局就此事已聯絡香港政府，並強調英方已多次要求港府及北京撤回相關歧視性措施，讓已移居英國嘅港人可以同其他永久離港人士一樣，提取自己嘅強積金。外交部表明：「呢種歧視係完全不能接受。」

滙控方面回應話，因為中國自2021年起唔再承認英國國民（海外）護照（BNO）係合法旅行證件或身份證明，所以佢哋旗下強積金平台無法處理相關申請，導致大量已移英嘅港人至今都未能提早提取自己嘅退休儲蓄。有報道指出，被凍結嘅強積金金額高達98億港元（即約9.78億英鎊），唔少受影響嘅人表示自己財務陷入困境。

英國國會跨黨派議員過去曾多次要求滙控撤回相關決定，批評呢個舉措根本無法律依據。據報滙控首席法律主管Bob Hoyt喺去年9月曾與英國外交部官員會面，商討解決方案。

英國外交部政務次官、負責印太事務、同時亦係「香港監察」創會贊助人嘅衛倩婷（Catherine West）表示，希望可以同滙控再就事件進一步傾談。

而英國國會外交事務特別委員會工黨成員Phil Brickell就呼籲政府要盡快出手幫助受影響港人：「今次電郵外洩，會令政府更加迫切要正視呢個問題，為受害人搵到解決方法。」

前港督彭定康（Chris Patten）亦透過「香港監察」發表聲明，批評港府以政治手段懲罰已取得外國居留權嘅港人，拒發強積金屬「赤裸裸嘅政治報復」，而家已經引起國際社會關注。

工黨下議院議員、「英國國會跨黨派香港小組」主席麥道國（Alistair Carmichael）早喺去年聽證會上就已經狠批，滙控同渣打等金融機構扣起移英港人退休金，根本係「國家級醜聞」，仲直斥佢哋「變成中共嘅共犯」。