日本首相石破茂喺上星期五（21號）喺首相官邸接見到訪嘅中國外交部長王毅，會後中國外交部官網即刻上載雙方會面內容。不過，日本政府事後發現，中方網站上載嘅內容與實際情況唔符，當中甚至包括石破茂「從未講過」嘅說話。日本已經正式向中方提出抗議，並要求刪除有關表述。

中國外交部官網聲稱，雙方就多個議題交換意見，並引述石破茂表示「日方尊重中方闡述嘅立場，願意同中方加強合作，推動雙邊關係發展」。但日本外務省就話，呢啲內容並非石破茂喺會談中講過，批評中方未經日方同意就擅自發表失實內容，表示遺憾。

日本外務省透露，石破茂其實喺會上主要關注東海局勢、在華日僑安全問題，並促請中方盡快解除對日本水產品進口禁令，並無提及「尊重中方立場」之類字眼。

直至星期一（24號）中午，中國外交部官網仍未刪除相關內容。而且，今次並唔係第一次中方被指「擅引日方言論」。早喺去年7月，王毅同時任日本外相上川陽子喺老撾會面後，中方同樣喺官網上載內容指日方「堅持一個中國政策未變」，當時亦即刻被日本外務省否認，批評有關內容與事實唔符，並指中方欠缺準確性。

喺今次中方聲明入面，除咗提到雙方有就中日關係交換意見，王毅仲講到台灣同歷史問題。佢指出，今年係中國人民抗日戰爭勝利80周年，希望日方以對歷史同未來負責任嘅態度，作出明智選擇，根據《中日聯合聲明》同其他三份政治文件，維護兩國嘅政治同法律基礎，履行喺歷史與台灣問題上嘅承諾。

同一個週末，中日第六次經濟高層對話亦喺東京舉行，由王毅同日本外相岩屋毅一齊主持。中方表示雙方達成咗20項「重要共識」，希望可以深化中日戰略互惠關係嘅經濟合作。不過，日方最關心嘅中國禁止進口日本水產品問題，仍然未有具體解禁時間表。

有北京研究中日關係嘅學者向台灣媒體表示，雖然雙方喺經濟層面釋出合作訊號，但整體嚟講，中日關係嘅改善更多屬於象徵性，實際進展仍然有限。佢指出，喺美國有機會再出現類似特朗普式政策之下，中日都想搵到合作空間，但目前只係就原則達成共識，實際執行仲要傾。而喺政治同安全領域，雙方嘅根本分歧仍然存在，繼續係影響兩國關係嘅關鍵障礙。