美國總統特朗普同俄羅斯總統普京日前進行咗接近兩個鐘嘅通話，討論俄烏停火問題。特朗普事後聲稱會談「非常好且富有成效」，但俄方就強調拒絕美方提出嘅全面停火方案，要求西方先停止對烏克蘭提供軍事援助。外媒仲報道，普京喺通話前刻意令特朗普等足一個鐘，形容呢個舉動係向美方施壓，並損害特朗普一向標榜嘅「強勢形象」。

據多間美國同歐洲媒體報道，特朗普同普京喺星期二（18號）通話後，雙方對外公佈嘅內容出現分歧。特朗普喺社交媒體發文話，雙方同意立即對所有能源同基礎設施停火，並會「迅速努力實現全面停火」。不過，俄羅斯克里姆林宮發言人就表示，普京只係同意暫停攻擊烏克蘭能源設施 30 日，並拒絕無條件全面停火，堅持要求美國同歐洲國家先停止對烏克蘭提供軍事援助，否則俄方唔會進一步讓步。

通話前發生嘅細節亦引起外界關注。《CNN》同《美聯社》等媒體報道，普京喺特朗普通話前，令佢等足約一個鐘，當時普京正在出席一場商界會議，當主持人提醒佢通話時間到時，佢笑住話「唔介意」，外界認為呢個舉動係刻意「擺姿態」，向美方施加壓力。此外，特朗普近日派遣特使維特科夫（Steve Witkoff）前往莫斯科會談時，同樣被俄方安排等足 8 個鐘，有分析指俄方係想藉此展現外交優勢。

有分析認為，特朗普喺會談中錯失向俄羅斯施壓嘅機會，反而令普京喺談判中獲得更大主導權。德國國防部長直言，呢場通話「形同一場空」，西班牙媒體亦指，今次會談未有對局勢帶嚟實質影響，反而畀咗普京更多戰略優勢，特朗普嘅外交形象亦受影響。

除咗與俄羅斯嘅談判受挫，特朗普亦表現出對俄中關係越嚟越密切嘅擔憂。佢喺通話後接受《霍士新聞》訪問時表示，對俄中聯盟嘅基礎感到懷疑，認為「呢個並唔自然」：「作為一個歷史學生，第一課就應該學識，千祈唔可以畀俄羅斯同中國走得太近。」佢補充話：「佢哋（俄中）而家可能好friend，但我哋仍然會同呢兩個國家保持友好關係。」外界認為，特朗普呢番言論反映咗佢擔心美國會因為俄中關係升溫，而喺國際局勢中被邊緣化。

美國國務卿盧比奧（Marco Rubio）早前亦有談及俄中關係，佢直言唔確定美國能否成功削弱兩國聯繫，並表示：「俄羅斯越嚟越依賴中國，呢個未必係一個好結果。」對此，中國外交部隨即回應，指「離間中俄關係完全係徒勞嘅」。

近年嚟，中俄關係持續深化，中國國家主席習近平同普京頻繁會面同通話，而特朗普雖然多次表示希望促成「特習會」，甚至邀請習近平訪美，但至今未見有實質進展。相比之下，俄羅斯喺國際舞台上嘅影響力似乎愈來愈強勢，令美國面對更大外交挑戰。