香港政府日前公佈新一份《財政預算案》，削減長者同學生福利，但無對高官、議員同公務員減薪，引起社會強烈反響。根據最新網上民調，接近一半受訪者對預算案比“零分”，有學生組織認為結果反映市民對政府極度不滿，亦有社運人士趁驚蟄“打小人”，抗議預算案“肥上瘦下”，呼籲立法會議員投下反對票。

財政司司長陳茂波喺上星期三（2月26日）喺立法會發表預算案，當中包括削減60歲以上長者公共交通2蚊優惠，同時大幅削減資助大學撥款。政府亦決定取消向中小學及幼稚園學生提供每年2,500蚊現金津貼，但就無回應社會對高官、議員同公務員減薪嘅訴求，只提出“凍薪”措施。

外號“女長毛”嘅社運人士雷玉蓮，星期三（3月5日）趁農曆驚蟄去灣仔鵝頸橋“打小人”，抗議政府喺財赤之下削減基層福利，卻無減高層薪酬。佢表示，政府削學生津貼根本幫唔到解決財赤問題，反而令基層生活更加艱難，批評政府“拿窮人開刀”，仲可能令國際恥笑。

喺驚蟄呢日，傳統上有市民“打小人”去趕走霉運同對付“小人”。雷玉蓮用拖鞋拍打新預算案封面，仲用肥豬肉塞住“祭白虎”口，象徵政府自肥，並且呼籲立法會議員喺審議預算案時憑良心投下反對票。佢強調，議員應該站喺市民立場，唔可以做政府嘅“橡皮圖章”。

根據Yahoo新聞喺2月26日至27日進行嘅網上民調，3,057名受訪者中，接近一半，即1,479人，畀預算案最低嘅“0”分，另有366人畀“1”分，而只有31人畀最高嘅10分。關注學童發展權利聯席（關學聯）主席Carmen表示，調查結果顯示市民對預算案極度不滿，批評政府加重基層家庭負擔，完全無顧及家長嘅憂慮。

Carmen透露，預算案公佈後兩日內，關學聯辦公室電話響到停唔到，唔少家長打嚟表示擔心。佢形容政府似乎將安撫市民嘅責任推畀非牟利機構，認為預算案“刀刀對準基層”，甚至影響基層家庭消費意欲，對經濟復甦極為不利。佢指出，如果政府真係想市民共渡時艱，應該由高官減薪開始，而唔係首先向基層開刀。

另外，《信報財經新聞》喺3月3日發表評論文章，指出預算案內兩項措施喺政界引起極大爭議，包括取消學生津貼，以及向跨境私家車徵收“邊境建設費”。文章引述立法會議員批評，呢個稅項同推動中港融合政策背道而馳，質疑政府未有充分諮詢議員意見，形容政府將議員變成“代罪羔羊”。有建制派人士更直言，政府施政缺乏全局觀，“紅隊”喺討論預算案時無全面評估負面影響，導致決策失誤。

文章亦指出，特首李家超上任時強調，問責官員喺推出重大政策前，應該進行批判性審視，並考慮社會反應。但今次預算案引起強烈不滿，反映政策制定過程存在問題，政府或需加強內部審議機制，以免進一步削弱公眾信任。