國際人權組織「中國人權捍衛者」今日發表報告，指中國政府喺2019年至2024年間大規模實施任意拘留，期間至少有1,545名因和平行使人權嘅良心犯被定罪，數千人遭拘押。報告分析認為，中國當局系統性嘅任意拘押行為可能已構成危害人類罪，當中涉及香港嘅案例亦不斷增加。

報告指出，良心犯嘅平均刑期約6年，如果涉及「國家安全」罪名，刑期會增加至7年。過去5年，中國共判處1,422名良心犯，而香港亦有123人因行使人權被判刑。中國當局頻繁以國安相關罪名定罪，被指依賴法律體系作為政治鎮壓工具，呢種侵權行為唔止出現喺內地，仲蔓延至香港。

報告特別提到，自2020年中國政府喺香港實施《國安法》後，港人嘅公民及政治權利大幅收窄，抗議活動被禁止，多個公民社會組織同工會因擔憂打壓而解散，新聞機構亦遭突襲搜查。數百人因和平示威或發表言論而被捕，聯合國及多國政府曾呼籲港府廢除該法例，但港府唔單止無回應，反而喺2024年3月再推《維護國家安全條例》，進一步加強管控。

根據報告數據，截至舊年年底，香港已有1,917名政治犯。「民主派初選案」就係其中一例，港府以「顛覆國家政權罪」起訴45人，僅僅因為佢哋參與初選，呢項指控佔香港同期良心犯總數嘅37%。報告亦提到，「47人案」釋放出明確訊息，北京政府對任何政治抗議或反對聲音都會迅速嚴厲鎮壓，即使喺香港，亦會剝奪港人所有法律權利同人權。

報告進一步指出，喺香港被判囚嘅良心犯之中，有50%並非因《國安法》定罪，而係因「煽動罪」或其他國安相關罪名被囚。「煽動罪」源自英國殖民時代，但隨住《維護國家安全條例》實施，呢條罪名嘅適用範圍愈來愈廣。例如，有人僅僅因為張貼單張，被指「煽動他人使用武力達到港獨」，最後被判監13個半月。

根據喬治城大學亞洲法律中心同《中國檔案》數據庫分析，被控《國安法》罪名嘅平均刑期為5.15年，而「煽動罪」則為1.08年。報告指出，雖然「煽動罪」刑期較短，但適用範圍極廣，涉及嘅行為多數受國際法保護，顯示港府正利用呢條罪名進一步打壓言論自由。

報告提出多項建議，包括建議中國政府遵循聯合國人權專家嘅意見，廢除《國安法》，修改國安相關法律以符合國際人權標準，並支持獨立國際調查，以評估中國政府嘅任意拘押行為是否構成危害人類罪。報告最後指出，中國政府長期利用任意拘押手段壓制異見人士及人權捍衛者，呢種做法並唔新鮮，但喺中國國家主席習近平領導下，相關行動嘅規模同嚴重程度不斷擴大。