壹傳媒創辦人黎智英依家仲被關押，佢個仔黎崇恩最近話，父親健康狀況急劇惡化，形容佢身體「已經崩潰」，如果美國同英國政府唔盡快行動，恐怕時日無多。佢呼籲國際社會加強施壓，促請中國當局即刻釋放黎智英。英國政府就回應，話黎智英案件仍然係英方嘅優先關注事項，並會繼續同中方交涉。

黎崇恩星期二（18日）喺瑞士日內瓦出席人權與民主峰會（Human Rights and Democracy Summit），佢接受《路透社》訪問時話，父親已經被單獨囚禁近四年，患有糖尿病，但喺獄中無法獲得適切醫療照顧，令身體狀況每況愈下，形容依家嘅待遇同酷刑無分別。佢強調：「時間已所剩無幾」（time is running out），如果美國同英國政府唔加快行動促成黎智英獲釋，後果難以想像。

英美政府曾多次表態關注黎智英案件，美國前總統特朗普去年10月競選期間公開承諾，如果成功當選，「百分之百會救出黎智英」。黎崇恩對此表示感激，認為呢番話帶嚟希望，佢亦呼籲英國政府採取更強硬立場，唔應該為咗維持同中國嘅關係，而忽視一名英國公民因捍衛民主而被監禁嘅情況。佢話，英國應該明確向北京表態，要求即刻釋放黎智英，確保佢嘅基本權利。

英國政府之後發表聲明，重申黎智英案件仍然係英方關注重點，並指去年11月，英國首相施紀賢同中國國家主席習近平會面時，已經提及黎智英嘅情況。美國政府就未有進一步回應，但美方官員之前多次要求中國釋放黎智英同其他異見人士。

香港特區政府就黎崇恩嘅言論表示強烈反對，批評佢發表錯誤信息，意圖抹黑香港法治。中國常駐日內瓦代表團亦表示，有關黎智英健康狀況嘅講法屬於「誹謗」，強調對黎智英嘅審判係依法進行，符合司法程序。

喺峰會現場，多名政界人士同人權組織代表聲援黎智英，包括英國自由民主黨前主席Sal Brinton等人，佢哋手持「因刊登真相而入獄」、「Free Jimmy Lai」等標語，並同黎崇恩合照。黎智英自2020年12月開始被關押，面對多項指控，其中「串謀勾結外國勢力罪」最高刑罰可達終身監禁。