有逾30年歷史嘅民主黨近日再傳醞釀解散，主席羅健熙星期三（19日）喺記者會上回應時未有正面確認，只話現階段唔方便透露詳情，並指中委會將於翌日開會商討前路。佢強調，任何決定都要按照黨章處理，並重申「我哋嘅討論無設限制，會傾所有可能性」。

消息指，民主黨內部對未來去向早有討論，特別係舊年年底中委會換屆後，曾多次商議發展方向，有部分黨員因為家庭或個人原因未有繼續擔任中委。羅健熙早前亦承認，喺現時政治環境下，黨內部分成員對未來方向有唔同考慮，甚至出現分歧。

星期二（18日）再次傳出民主黨可能解散嘅消息，羅健熙翌日喺記者會上回應，話依家仲未有定案，但強調黨內會討論所有可能性。至於民主黨會唔會因為壓力過大，或者想藉此向北京釋放「如果無得參選就解散」嘅訊號，羅健熙就話：「我哋會討論啲咩、檢視啲咩，呢啲細節我無法解答。」

如果民主黨最終決定解散，會涉及啲咩程序？羅健熙表示，呢個仍然要等中委會開會討論後先可以決定，但佢直言，若真係要走上呢一步，都只能夠坦然接受，「如果真係需要（解散），我哋都只能夠去面對。」

對於民主黨嘅前景，前民主黨黨員許智峯話，明白民主黨依家正反思自己存在嘅價值，亦指出政府對民主黨態度已變得邊緣化，令佢哋喺財政同政治層面都舉步維艱。佢批評當局「唔畀民主黨籌款，即係唔畀佢運作」，仲話民主黨即使以壓力團體身份發聲，都難以同政府對話。

許智峯形容，如果民主黨最終解散，將會係香港歷史上一個重要時刻，並感嘆：「呢個反映咗喺國安法之下，即使係最溫和、最願意同政府溝通嘅政黨，都被完全抹煞。」佢認為，香港社會失去咗批評聲音，將難以進步，而當前環境亦令唔少民主黨黨員擔心自身安全，「社會喺高壓狀態下，隨時有被捕風險。」

雖然如此，許智峯話，佢唔會呼籲民主黨解散，因為佢相信黨內仍然有唔少人堅持理想，「無論佢哋最後決定點樣，我都會畀佢哋最大嘅祝福。」民主黨前身係港同盟，1994年同「匯點」合併成立，曾經係香港議會內最大政黨。根據《公司條例》，民主黨而家係以有限公司形式運作，擁有大約400名黨員，如果要解散，必須經過會員大會通過，而唔係單憑中委會決定。