香港經濟近年陷入結構性衰退，港澳辦主任夏寶龍早前要求港府「破局」，但行政長官李家超至今仍未有明確應對方案，反而喺星期二（18日）宣布推動大型盛事活動，希望帶動經濟復甦。前全國政協常委何柱國就狠批政府「明日大嶼」計劃，建議暫停賣地三年，恢復供求平衡，避免香港財政進一步惡化。

李家超昨日出席行會前表示，3月將舉辦多場國際體育同娛樂盛事，包括啟德體育園開幕禮、世界格蘭披治桌球大獎賽、「LIV Golf 香港站」同香港國際七人欖球賽等。他強調：「預計上半年各種盛事會吸引約84萬旅客，為香港帶嚟約33億元消費額，亦會帶嚟18億元經濟增加價值。」

現年75歲嘅何柱國，係香港煙草創辦人何英傑嘅長孫，外號「煙仔何」。佢喺星期一（17日）接受電台訪問時直言，香港經濟困局難解，政府應該先處理房地產市場，而唔係貿然推動大型基建。佢批評：「政府財政已經赤字，仲賣地嚟做咩？每季賣一幅，你賣緊咩？豬肉呀？當豬肉賣？」佢強調，目前樓市低迷，應該停賣地三年，穩定市場，避免資產價格進一步下跌。

另外，佢亦質疑「明日大嶼」可行性，認為香港唔似美國，冇足夠資源支持無限舉債。佢直言：「香港唔係美國，美國可以無限量增資，因為有石油、有資源，香港有咩？香港淨係得人！所以你話要舉債？舉你XX，舉幾多年？」 講到中央對香港經濟政策嘅影響，何柱國認為北京最關心經濟發展，未必會干預港府決定是否推行「明日大嶼」，並表示：「習主席或者其他人會唔會理？佢哋最重視經濟，破局搞好經濟，唔做大嶼（明日大嶼）又如何？」

佢重申應該參考97年亞洲金融風暴後嘅做法，政府暫停賣地，控制樓價穩定市場信心，並反問：「而家賣地有收入？你計條數畀我睇？冇就停（賣地），先『止血』，等市民有信心，知道政府控制緊樓價，等銀行止血，有生意做，呢個先係最實際。」

訪問中，何柱國亦透露，自己數月前確診肺癌，並已完成治療。佢坦言，以前對控煙政策唔以為然，但經歷病痛後改觀：「我以前最唔鐘意盧寵茂，成日喺度禁呢樣禁嗰樣，我仲話，我做人，我吸煙有自由吖，死唔死係我事。但後來回想，我都要感謝佢。所以我平衡過，最後都戒煙。」

何柱國又話，曾考慮去美國求醫，但最終決定留喺香港，並對本地醫療體系表示讚賞，認為港府應該將醫療發展成經濟支柱，吸引全球富裕病人嚟香港治療。昨晚盧寵茂發文稱衷心祝願何柱國身體健康，亦感謝佢以自身經歷勸市民戒煙。盧寵茂表示，政府正計劃推出10項控煙措施，進一步減低煙草對市民健康嘅影響。