政府將喺本月底公布新一份財政預算案，面對龐大財赤，不同政黨同團體都提出咗多項建議。實政圓桌建議政府寬免商舖物業差餉一年，希望幫零售業紓困。立法會議員田北辰指出，即使深圳放寬「一簽多行」，數據顯示零售業銷貨額2024年12月比11月跌得更勁，按年下跌9.7%。佢認為，雖然遊客有增加，但消費力未見提升，「香港零售業再要靠遊客去救我哋呢，我覺得我哋係度發緊夢」，並指租金成本下調同免差餉措施或有助緩解困境。

另一方面，長者兩蚊乘車優惠亦成為熱話。民建聯上星期向政府提交咗預算案建議，強調唔應削減長者福利。該黨立法會議員李世榮喺電台節目中話，政府一直無公布「長車短途」同濫用情況嘅詳細數據，但認為計劃可以鼓勵長者外出探親同消費，有助佢哋嘅身心健康。

李世榮又指出，長者兩蚊乘車計劃其實為巴士公司帶嚟額外收入，政府應該要求巴士公司落車拍卡同雙向分段收費，以減少政府補貼壓力。對於坊間有聲音倡議設立乘車次數或金額上限，佢認為政府喺作出決定前應該先公開數據，避免對長者造成不便。

此外，民建聯建議公務員凍薪，李世榮認為減薪可能會影響士氣，而凍薪則較為合理，亦可以顯示公務員願意共渡時艱，「參與咗、盡一分力」。

實政圓桌亦支持高官、立法會議員、區議員及公務員凍薪，並指此舉有機會節省約80至90億元。田北辰進一步建議縮減公務員編制同停止招聘，佢指出，過去10年政府總薪酬開支增長超過6%，遠高於私人市場約3%嘅增長，認為應該削減低層職位同調整高層職位比例。

翻查資料，去年度公務員薪酬開支為1,562億元，佔政府開支約25.98%，比2022/23年度增加71億元。而長者兩蚊乘車優惠計劃本年度預計開支則為60億元。